Тошкентдан Волгоградга йўловчи поездлар қатнови йўлга қўйилмоқда

Россия Федерациясининг Волгоград шаҳрига ҳам йўловчи поездларнинг қатнови қўйилмоқда. Бу ҳақда «Ўзбекистон темир йўллари» хабар берди.

Фото: Kun.uz

Қайд этилишича, 2022 йил 25 июндан бошлаб 324/323-сонли «Тошкент – Волгоград – Тошкент» йўналишларида йўловчи поездининг қатнови бошланади.

324/323-сонли «Тошкент – Волгоград – Тошкент» йўналишларида йўловчи поезд ҳафтанинг шанба куни соат 23:58 да «Тошкент-Марказий» темирйўл вокзалидан жўнаб кетади ва сешанба куни соат 09:56 да Россиянинг «Волгоград» темирйўл вокзалига етиб боради. Волгограддан эса сешанба куни соат 19:59 да жўнаб кетиб, «Тошкент-Марказий» вокзалига жума куни соат 06:54 да етиб келади.

Маълумот учун, Тошкентдан Волгоградгача темирйўл орқали бўлган бўлган масофа 2996 километрни ташкил этади. Поезд 60 соат давомида ҳаракатланади. 324/323-сонли «Тошкент – Волгоград – Тошкент» йўналишларида йўловчи поезд 11 та вагондан иборат: 3 купе, 7 плацкарта ва вагон-ресторан.

Чипта нархи тўғрисидаги маълумотни, сотув муддатига қараб чегирмаларни ҳисобга олган ҳолда, www.chipta.railway.uz, www.e-ticket.railway.uz сайтлари орқали билиб олиш мумкин.

Бундан олдин «Ўзбекистон темир йўллари» Россия билан тикланаётган поездлар ҳаракати ҳақида расман маълум қилганди.

#поезд #Волгоград