NASA Ойга астронавтларни қачон юборишини маълум қилди

Астронавтлар 2026 йил апрелида Ойга юборилиши режа қилинган. Космик кема Ой атрофини бир марта айланиб чиқиши ва Ерга қайтиб, Тинч океанига қўниши керак.

Фото: NASA

Artemis II миссиясининг тўрт нафар астронавт билан Ой атрофидаги парвози келаси йилнинг апрел ойидан олдин амалга оширилмайди, деб хабар берди NASA маъмурияти ёрдамчиси Лакиш Ҳокинс матбуот анжуманида.

Унинг сўзларига кўра, парвозга асосий тайёргарлик 2026 йил феврал ойида якунланиши керак. Шу билан бирга, у миссиянинг асосий устувор вазифаси бошқариладиган Orion кемаси экипажининг хавфсизлиги эканини таъкидлади. У Ой атрофини бир марта айланиб чиқиши ва Ерга қайтиб, Тинч океанига қўниши керак.

Artemis I миссияси доирасида Orion космик кемаси билан SLS элтувчи ракетасининг биринчи синов парвози 2022 йил ноябр ойида амалга оширилди.

2027 йилда Artemis III миссияси давомида кема астронавтлар билан бирга Ойга қўниши керак. 2028 йилда бошқариладиган Artemis IV миссияси режалаштирилган бўлиб, унинг доирасида Orion кемаси Ой атрофидаги станция билан боғланади, сўнгра астронавтлар яна бир бор Ой юзасига қўнади.

Инсон охирги марта 1972 йил декабр ойида Ойга учган - бу Американинг Apollo 17 миссияси эди. Астронавтлар Южин Сернан ва Ҳаррисон Шмитт Ой юзасида тахминан 3 кун бўлиб, Ерга муваффақиятли қайтган.

Тайёрлаган: Сардор Юсупов

#NASA #Ой #Artemis