Янгиланган Damas ва Cobalt, 8 қаватга қисқарган «қўзиқорин уй» – маҳаллий дайжест

Кун давомида Kun.uz ёритган муҳим маҳаллий янгиликлар билан таништирамиз.

{Yii::t(}

Ўтказиб юбориш 6s

Ўтказиб юбориш

Янгиланган Damas ва Cobalt ишлаб чиқарилади

UzAuto Motors ўзининг энг харидоргир икки автомобили – Chevrolet Damas ва Cobalt автомобиллари бўйича кутилаётган янгиликлар ҳақида маълум қилди.

Жумладан, Damas минивени янги версиясини ишлаб чиқариш йўлга қўйилади. Унда автомобил ўлчамлари катталашади, юк кўтариш қобилияти ва сиғими ошади. Янги моделнинг йўловчи версияси Damas Move деб номланди. Юк-йўловчи версиясига эса Damas Max деб ном берилди.

Chevrolet Cobalt автомобилининг ҳам ҳозирда мавжуд комлектацияларига қўшимча равишда, иккита янги Cobalt Style MCM ва Cobalt Midnight MCM версиялари тақдим этилади. Кейинги босқичида автомобилнинг ташқи кўриниши ўзгартирилади.

Нархлар ва сотув бошланиши санаси кейинроқ маълум қилинади.

Тошкент метросининг 14 та янги бекатини қайта очиш кечиктирилди

Тошкент метросининг ерусти ҳалқа йўли йўналиши таъмирдан кейин аввал айтилганидек 18 октябрда эмас, тахминан 1 ноябрда очилади.

14 та бекатдан иборат «Мустақилликнинг 30 йиллиги» йўналишида «Қипчоқ» ва «Турон» бекатлари 8 июндан бери, «Қурувчилар»дан «Янгиобод»гача бўлган 6 та бекат 28 июндан бери, «Янгиобод»дан «Дўстлик»кача бўлган сўнгги 6 та бекат 2 августдан бери ёпиқ қолмоқда. Расмийлар таъмирлашни «режали профилактик ишлар» деб атамоқда.

Тошкент метросининг ерусти ҳалқа йўли («Мустақилликнинг 30 йиллиги» йўналиши) 2017-2024 йилларда қурилган эди. 2025 йил июнига келиб, йўналишда релслар ва шпалларни алмаштириш бошланди. Транспорт прокуратураси бу жараёнда қатор камчиликлар аниқлангани ҳақида хабар берган.

Самарқанддаги «қўзиқорин уй»нинг саккиз қавати бузиб ташланди

Самарқанд туманида Фурқат Халилов томонидан қурилган ва сейсмик жиҳатдан хавфли деб топилган 12 қаватли бинони бузиш жараёни давом этмоқда. Ижро жараёни Фуқаролик ишлари бўйича Тойлоқ туманлараро судининг 2022 йил 6 июлдаги қарори асосида амалга оширилмоқда.

Мазкур бино қурилиши 2012 йилда, ҳеч қандай архитектура рухсатномаси, сейсмик ва геология хулосаларисиз, хусусий тартибда қурилиши бошланган. Мутахассисларнинг таъкидлашича, бино қурилиш меъёрларига жавоб бермайди, хавфли ва сейсмик жиҳатдан етарли даражада барқарор эмас.

Докторантура ва бошқа илмий тадқиқот йўналишларига қабул квотаси тасдиқланди

2026 йил учун стажёр-тадқиқотчилик, таянч докторантура, докторантурага илмий кадрларни тайёрлаш бўйича қабул квотаси тасдиқланди.

Юқоридаги барча йўналишларга 5300 та квота ажратилган бўлиб, шундан 4094 таси таянч докторантура, 714 таси докторантура, 398 таси стажёр-тадқиқотчи йўналишларига берилади. Мақсадли докторантурага (DSc ва PhD) 76 та ўрин ажратилади. Экология соҳасидаги хотин-қизлар учун уч йўналишга 18 та ўрин берилади.

Олий таълимдан кейинги таълимнинг барча шакллари ва стажёр-тадқиқотчилик учун ҳужжатлар қабули 2025 йил 5 ноябргача давом этади.

Мева-сабзавотларга минимал экспорт нархлари бекор қилинади

Президент фармонига кўра, мева-сабзавот маҳсулотларини экспорт қилишда давлат томонидан минимал нархларни белгилаб қўйиш амалиёти тўхтатилади. Бу тартиб ўтган йили жорий этилган ва таҳлилчилар уни «мева-сабзавот экспортига зарба» деб атаганди.

Мева-сабзавотлар, шунингдек, тўқимачилик, чарм-пойабзал маҳсулотлари ва электр жиҳозлари экспортида минимал нархлар амалиёти 2024 йилда жорий этилган эди.

Фармонда иссиқхона хўжаликларига табиий газ кафолатли тарзда етказиб берилиши ҳам белгиланган, шунингдек, иссиқхоначиларга солиқ имтиёзи берилган.