Damas ва Cobalt'да янгиланишлар эълон қилинди   

UzAuto Motors ўзининг энг харидоргир икки автомобили – Chevrolet Damas ва Cobalt автомобиллари борасида кутилаётган янгиликлар ҳақида маълум қилди.

Damas

Хабар қилинишича, ташкил қилинаётган ишлаб чиқариш қувватларида Damas минивенлари янги версиясини ишлаб чиқариш йўлга қўйилади.

Янги версияда автомобил ўлчамлари катталашган, юк кўтариш қобилияти ва сиғими ошган.

“Шунингдек, ҳайдовчи ва йўловчилар учун қулайлик сезиларли даражада яхшиланган”, дейилади пресс-релизда.

Янги моделнинг йўловчи версияси Damas Move деб номланади. Юк-йўловчи версиясига эса Damas Max деб ном берилган.

Янги модел эскиси билан бир вақтда ишлаб чиқарилади ва харидорларда танлов имконияти бўлади.

Cobalt

Chevrolet Cobalt автомобилининг ҳам ҳозирда мавжуд комлектацияларига қўшимча равишда, иккита янги Cobalt Style MCM ва Cobalt Midnight MCM версиялари тақдим этилади.

Бу версиялардаги янгиликлар қуйидагилардан иборат бўлади:

• автомобил двигатели янгиланган;
• ABS тизими такомиллаштирилган;
• двигател ва унинг тизимларини бошқарувчи янги блок ўрнатилган;
• хавфсизлик ёстиқчалари ва ҳимоя функциялари учун замонавий бошқарув блоклари ва янги авлод диагностика модули жорий этилган;
• Android Auto ва Apple CarPlay'ни қўллаб-қувватлайдиган сенсорли мултимедиа тизими;
• круиз-контрол тизими;
• эко-чармдан қилинган ўриндиқлар;
• олд ўриндиқларнинг иситиш функцияси;
• асбоблар панели янгиланган;
• мултимедиа ва круиз-контролни бошқариш тугмалари билан жиҳозланган рул;
• интерьерда янги декоратив элементлар.

“Асосий автомобилнинг жами 50 дан ортиқ асосий компонентлари янгиланди”, – дейилади расмий хабарда.

UzAuto'га кўра, Cobalt'ни ривожлантиришнинг кейинги босқичида автомобилнинг ташқи кўриниши (фейслифт) ўзгартирилади. Бу йўналишдаги ишлар аллақачон бошлангани маълум қилинди.

Cobalt'нинг янги модификациялари мавжуд комплектациялар билан параллел равишда ишлаб чиқарила бошланган.

“Энди мижозлар жиҳозланиш даражаси ва функционаллиги билан фарқланувчи Cobalt'нинг тўрт хил модификациясидан бирини танлаш имкониятига эга”, – дея маълум қилди ишлаб чиқарувчи.

Нархлар ва сотув бошланиши саналари кейинроқ маълум қилинади.