Трамп АҚШ маъқуллаган раҳбаргина Эронни бошқариши мумкинлигини айтди

Эроннинг янги олий раҳбари аввал АҚШнинг маъқулловини олишига тўғри келади, АҚШ президенти Доналд Трамп ABC News телеканалига берган интервюсида.  

«Уни биз маъқуллашимиз керак бўлади. Агар бизнинг маъқулловимизни олмаса, у тахтда узоқ қололмайди. Ҳозир қилаётган ишимизни ҳар ўн йилда қайтадан бажаришга тўғри келмаслигига ишонч ҳосил қилишимиз керак», — деди у.

Шу билан бирга, Трамп Эроннинг амалдаги ҳокимиятига алоқадор номзодни ҳам маъқуллаши мумкинлигини айтди. Унинг сўзларига кўра, бунга муносиб одамлар кўп.

У Эрон бутун Яқин Шарқни босиб олишни режалаштиргани ва «ҳужум қилмоқчи бўлган»ини қўшимча қилди.

Эрон олий етакчиси Али Хоминаий 28 феврал куни Исроил ва АҚШ зарбалари оқибатида ҳалок бўлганди. Ҳозирда мамлакатни президент Масъуд Пизишкиён, Олий суд раиси Ғулом-Ҳусайн Муҳсиний ва Эрон Фиқҳ кенгаши аъзоси Алиризо Аърофийдан иборат Муваққат кенгаш бошқармоқда.  

Янги олий етакчи 88 нафар руҳоният вакиллари (мужтаҳидлар)дан иборат Экспертлар кенгаши томонидан сайланиши керак.  

Аввалроқ Исроил мудофаа вазири Исраэл Кац Эроннинг Ҳоминаий йўлини давом эттирадиган ҳар қандай янги етакчиси йўқ қилиш учун нишонга айланишини айтганди. Трамп эса ҳокимиятга Али Хоминаийнинг ўғли Мўжтабо Хоминаий келишини қўллаб-қувватламаслигини ва мамлакатнинг янги раҳбарини танлашда шахсан иштирок этиш нияти борлигини билдирган.