Lacetti иккига бўлиниб кетган авария оқибатида икки киши ҳалок бўлган

Тошкент шаҳар ИИББ матбуот хизмати Юнусобод туманида рўй берган даҳшатли йўл-транспорт ҳодисаси оқибатлари ҳақида бир ҳафта ўтиб маълумот берди: икки киши ҳалок бўлиб, уч киши жароҳатланган. 

Ушбу даҳшатли ЙТҲ 30 июн куни соат эрталабки 5:10 атрофида Амир Темур – Боғишамол кўчалари чорраҳасида содир этилганди.

Ижтимоий тармоқларда тарқалган видеода Lacetti ҳайдовчиси қайрилмоқчи бўлганида ўнг томондан ўта юқори тезликда ҳаракатланган Zeekr уни айланиб ўтиб кетгани, аммо шу каби тезликда келган Kia K5 автомобили тўқнашувдан қочиб қутула олмаганини кўриш мумкин. 

Тўқнашув оқибатида Lacetti иккига бўлиниб кетган.

Оқибатда Lacetti автомобилидаги икки киши ҳалок бўлган. Уч киши, жумладан, икки ёш бола оғир тан жароҳатлари билан шифохонага ётқизилган.

Дастлабки тергов маълумотларига кўра, Kia ва Zeekr автомобилларини вояга етмаган шахслар бошқарган.

Kia бошқарувида бўлган мактаб ўқувчиси машинани отасидан сўрамасдан олиб чиқиб кетганини айтган ва халқдан узр сўраган.

«Ўртоқларимни чақирган эдим. Мақсад озгина машина ҳайдаш эди. NBU банк тарафидан келаётган эдим, чорраҳада Lacetti йўлга чиқиб қолди, тезлигим катта бўлгани сабабли машинани тўхтата олмай қолдим. Қилган ишимдан жуда катта афсусдаман. 

Вафот этган одамларнинг қариндошларидан узр сўрайман. Ота-онамдан узр сўрайман, бунақа бўлишини хоҳламаган эдим. Ота-онамнинг юзини ерга қаратдим. Халқимиздан узр сўрайман, қилган ишим учун узр сўрайман. Мен тенги ёшларга рулга ўтиришни маслаҳат бермайман, ёмон нарсага олиб келар экан», – дейди у.

Унинг отаси ўғли қонун доирасида жазоланишига рози эканини билдирган.

«Ўғлим машинанинг калитини олиб чиқиб кетиб, бировнинг оиласини барбод қилди. Қариндош-уруғларидан узр сўрайман, опа-укаларидан, ҳаммасидан узр сўрайман. Ўғлимга ҳам, нима жазо бўлса, қонун доирасида кўришингизга тайёрмиз», – деган ота.

Zeekr бошқарувида бўлган мактаб ўқувчиси эса воқеа жойидан қочиб кетганини тан олган.

«Мен яшил чироқда ўтиб кетаётганимда, Lacetti қайрилишга туриб олган эди ва юришни бошлаганди. Кейин ўртоғим унга урилиб кетган экан. Шок ҳолатида уйга кетиб қолдим. Бунақа иш бўлганидан жуда ҳам афсусланаман. Мен хоҳламагандим бунақа бўлишини, кечирим сўрайман ҳаммадан, ота-онамдан ва у оиладан ҳам», – дейди у.

«Мен боламни назоратсиз қолдирдим деёлмайман, чунки бу ҳолат болам уйда, мен уйда, ҳаммамиз ухлаяпмиз, деб ўйлаган пайтда бўлган. Билмайман, бу қандай бўлди, боламдан буни кутмагандим.

Озгина ҳайдайман, кўчадан дарров олиб кириб қўяман гаражга, деб ўйлагандим деяпти. Машинанинг бунақа тез машиналигини тушунмай қолдим, деб ўзи тушунтиряпти менга.

Мен ҳам афсусдаман, бу ҳам афсусда. Бу ўзининг ич-этини еб, тамом бўлди. Бунақа ҳолат бошқа бўлмайди. Катта бўлсам ҳам ўтирмайман рулга, деяпти. Мен у оиладан жуда узр сўрайман, биз ҳам сабабчи бўлиб қолганимиз учун», – дейди унинг онаси.

Ушбу ҳолат юзасидан жамоатчилик муҳокамаси ўтказилган, унда маҳалла фаоллари ҳамда ушбу ўқувчилар таҳсил олаётган мактаб ўқитувчилари ва ўқувчилар иштирок этган.

Мазкур ҳолат юзасидан ИИББ Тергов бошқармаси томонидан Жиноят кодексининг 266-моддаси 3-қисми «а» банди билан (Транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлса) жиноят иши қўзғатилган.

Ҳолатга объектив ва холисона баҳо бериш юзасидан тергов гуруҳи тузилган. Ҳозирда дастлабки тергов ҳаракатлари олиб борилмоқда, дейилади хабарда.