Aziz Toshpo‘latov IIVning yangi rahbari bo‘ldi

Aziz Anvarovich Toshpo‘latov Ichki ishlar vaziri lavozimiga tayinlandi. Bu haqda O‘zbekiston prezidentining tegishli farmoni imzolangan.

Davlat rahbari matbuot xizmati xabariga ko‘ra, general-mayor A.Toshpo‘latov nomzodi Oliy Majlis Qonunchilik palatasi deputatlari tomonidan ma’qullangan. 

Aziz Toshpo‘latov 1978 yilda tug‘ilgan, muqaddam Namangan viloyati IIB (2015–2017), Samarqand viloyati IIB (2017–2019), ichki ishlar vazirining birinchi o‘rinbosari (2019–2020) kabi lavozimlarda ishlagan, 2020 yil martida Toshkent shahri IIBB boshlig‘i lavozimiga tayinlangandi.

2021 yil yanvarida O‘zbekiston prezidenti farmoni bilan «general-mayor» maxsus unvonini olgan.

U IIV rahbari lavozimida 2017 yil sentabridan buyon ishlab kelgan Po‘lat Bobojonovni almashtirdi.

Eslatib o‘tamiz, 2024 yil noyabrida O‘zbekistonning qator kuchishlatar tuzilmalarida rahbarlar almashgandi – dastlab DXX raisi Abdusalom Azizov lavozimidan olinib, uning o‘rniga mudofaa vaziri Bahodir Qurbonov o‘tkazilgandi. O‘z navbatida, mudofaa vazirligi rahbarligiga Shuhrat Xolmuhammedov kelgandi.

Bu o‘zgarishlar prezident administratsiyasi sobiq mulozimi Komil Allamjonovga suiqasd bilan bog‘liq ekani aytilgan.

Bundan tashqari, Toshkent shahar IIBB boshlig‘i birinchi o‘rinbosari Doniyor Toshxo‘jayev, IIV Tezkor qidiruv departamenti Jinoyat qidiruv xizmati boshlig‘i Ahrorjon Adhamov hamda Toshkent shahar IIBB Tezkor qidiruv xizmati Jinoyat qidiruv boshqarmasi Uyushgan jinoyatchilikka qarshi kurashish bo‘limi boshlig‘i Timur Sobirov ham ishdan olingan. Keyinroq Doniyor Toshxo‘jayev Allamjonovga suiqasd ishida ayblanib, 7 yil muddatga ozodlikdan mahrum etildi.