Жорж Бушнинг қизлари Обаманинг фарзандларига мактуб йўллади

АҚШнинг 43-президенти Жорж Буш қизлари Барбара ва Женна Барак Обаманинг қизлари Малия ва Сашага мактуб ёзишди. Ундан Оқ уйдан ташқаридаги ҳаётга тегишли маслаҳатлар жой олган, деб хабар бермоқда Time.

"Эндиликда сиз собиқ президентлар фарзандлари клубига киришингизга тўғри келади – ўзингиз интилмаган позиция", - дейилади мактубда.
Шунингдек, улар Оқ уйда меҳнат қиладиган кишилар, хусусан, гулчи Нэнсини ёддан чиқармаслик ва АҚШ Махфий хизмати агентлари билан алоқада бўлишни маслаҳат беришган.

"Биз Махфий хизмат билан алоқада қоламиз. Унинг ходимлари бизнинг улғайишимизга гувоҳ бўлишади: биринчи учрашувлар, унаштириш ва ҳаттоки асал ойи. Биз буларнинг барчаси осон эмаслигини биламиз – сиз, худди биз каби, ўсмир бўлгансиз ва улар ортингиздан соядек эргашиб юришган. Бироқ улар сиз сабаб ўз ҳаётларини хавф остига қўйишган", - дея таъкидлаб ўтган Барбара ва Женна Буш.

Шунингдек, улар ўз мактубида Обаманинг қизлари Оқ уйдаги босимга кўпроқ дуч келишгани, ота-онасининг нотаниш кишилар томонидан жиддий танқид қилинишига гувоҳ бўлишгани ҳақида ёзишади.

Маълумот учун, АҚШнинг сайланган президенти Дональд Трампнинг инаугурацияси 20 январь куни ўтказилади. Ўша куни Барак Обама ва унинг оиласи Оқ уйдан чиқиб кетади.