Ойдаги ҳаётни такрорловчи кабинада қолиш бўйича жаҳон рекорди ўрнатилди

Ойдаги ҳаёт симуляцияси бўйича бир йиллик тажрибанинг иккинчи – 200 кунлиги Пекиндаги ихтисослаштирилган лабораторияда муваффақиятли якунланди. Тўрт нафар кўнгилли талаба ёпиқ кабинада бўлиш вақти бўйича янги жаҳон рекордини ўрнатди. Бу ҳақда Синьхуа агентлиги хабар берган.

Таъкидланишича, аввалги рекорд СССРдан бўлган уч кишилик гуруҳга тегишли бўлиб, улар ёпиқ ҳолдаги бўшлиқда 180 кун давомида қолишган. Тажриба ўтган асрнинг етмишинчи йилларида ўтказилган.

Жума куни Хитой ой дастурини амалга ошириш бўйича тайёргарлиги доирасида лойиҳанинг 105 кунлик якуний босқичи старт олди. Унда биринчи 60 кунликда қатнашган кўнгиллилар гуруҳи иштирок этади.

Тажриба Хитойнинг Бэйхан давлат техник университетида жойлашган "Юэгун-1" ("Ой саройи-1") лабораториясида ўтказилмоқда. У 160 квадрат метрлик ёпиқ кабина кўринишига эга. Бу ҳаёт таъминотининг биорегенератив базасига эга Хитойдаги биринчи, жаҳондаги учинчи лабораториядир.