Ойнинг орқа томони янги ҳарбий ҳаракатлар майдонига айланиши мумкин — ҳар ҳолда, Доналд Трамп маъмурияти ўз режаларини амалга ошира олса.
Air & Space Forces нашри маълумотларига кўра, Трамп маъмурияти даврида АҚШ Космик кучлари 2029 йилгача Ой атрофидаги фазога бешта сунъий йўлдош учириш имкониятини кўриб чиқмоқда. Агар бу режа амалга оширилса, Американинг ҳарбий аппаратлари Ой атрофида парвоз қилиб, жумладан, унинг орқа томони устидан ҳам учиб ўтади.
Бу ҳақдаги маълумот аэрокосмик техника ишлаб чиқарувчиларига йўлланган махсус билдиришномада келтирилган. Унда Пентагон Ой атрофида гравитацион манёврдан фойдаланиб, амалда разведка миссияларини бажариши керак бўлган аппаратларни учиришга дастлабки қизиқиш билдираётгани айтилган.
Ҳужжатда шундай дейилади: «Бу аппаратлар илк тажриба платформаларига айланиши мумкин. Улардан фойдаланиш натижалари Ой атрофидаги фазода келажакда ташкил этилиши мумкин бўлган тақсимланган сунъий йўлдошлар гуруҳи учун харидлар стратегиясини ишлаб чиқишда қўлланилади. АҚШ ҳукумати саноат вакилларидан Ойнинг орқа томони ҳудудида разведка миссиясини ўтказиш учун тезкор ва хавфи кам ечим таклиф этиш имкониятлари ҳақида маълумот сўрамоқда».
АҚШ Космик кучлари вакилларининг, хусусан, генерал-майор Стивен Пердининг баёнотларига қараганда, Пентагон Ой атрофидаги фазони «ҳарбий ҳаракатлар ҳудуди»га айлантиришни жиддий ният қилган.
Америкалик ҳарбийларнинг Ер ва Ой оралиғидаги фазога қизиқиши ортишига асосий туртки, афтидан, Хитой Халқ Республикаси бўлган. Хусусан, гап Пекиннинг 2030 йилгача Ойга одамларни қўндириш режалари ҳақида бормоқда.
