2017 йил неча тонна мева-сабзавот маҳсулотлари етиштирилгани маълум 

Ўтган йили Ўзбекистон деҳқон, фермер ва томорқачилари томонидан жами 21,4 миллион тонна мева-сабзавот маҳсулотлари етиштирилди. Шундан 11,4 миллион тоннаси сабзавот, 2,1 миллион тоннаси полиз, 3 миллион тоннаси картошка, 3,1 миллион тоннаси мева бўлса, 1,8 миллион тоннасини узум ташкил этди. Бу ҳақда “Халқ сўзи” хабар бермоқда.

Маълум қилинишича, аҳолини йил давомида боғ ва дала неъматлари билан узлуксиз таъминлаш, бозорлардаги нарх-навонинг барқарорлигини сақлаш ҳамда экспорт салоҳиятини ошириш мақсадида кўрилган амалий чора-тадбирлар шундай ижобий натижа қўлга киритилишида муҳим омил бўлди. 

Республика бўйича 13 минг гектар интенсив боғлар, 7 минг гектар токзорлар барпо этилиши баробарида, 15,2 минг гектар яроқсиз боғлар ҳамда 9,1 минг гектар яроқсиз токзорлар реконструкция қилингани тармоқда ҳосилдорлик ошишини таъминламоқда. 

Қисқартирилган пахта ва ғалла майдонлари ўрнига ҳам мева-сабзавот экинлари жойлаштирилаётгани озиқ-овқат маҳсулотлари етиштириш ҳажми ортишига катта туртки бўлмоқда. Хусусан, 2016-2017 йилларда шундай ер майдонларининг 8,5 минг гектарида интенсив боғлар, 4,4 минг гектарида токзорлар барпо этилди. Шунингдек, 39,9 минг гектар сабзавот, 13,2 минг гектар картошка экинлари экилиб, ҳосил кўтарилди.