Катта ўлчамли Lada йўлтанламаси. Ҳозирча 3D-моделдаги кўринишда

Lada бренди остидаги катта ўлчамли йўлтанламаснинг ҳозирча 3D-моделдаги кўриниши эълон қилинди. Бу машина чиқишини кўпчилик кутмоқда. Азалдан Вольга автозаводининг ягона йўлтанламаси “Нива” машинаси бўлиб келган ва у бир қатор янгиланишлар ҳамда Lada 4x4 деб ном олгандан кейин бироз беўхшовроқ кўриниш олганди. Янги мингйиллик бошида Chevrolet Niva, охирги йилларда эса “АвтоВАЗ”нинг моделлар қаторида Lada XRAY кроссовери ва Lada Vesta SW Cross универсали пайдо бўлди, бироқ бу машиналарни ҳам тўлақонли йўлтанламаслар деб аниқ айтиб бўлмайди.

Тольяттидаги заводда BMW X5, Toyota Land Cruiser, VW Touareg, KIA Sorento ёки ҳаттоки УАЗ “Патриот” каби тўлиқ приводли йўлтанламасларнинг муқобили йўқ. Шу сабабли бу борада ҳаваскорларнинг ўзлари ғоялар беришмоқда. Мисол учун, россиялик дизайнер Александр Шторм Lada брендидаги бундай машина қандай кўриниши мумкинлиги борасидаги фаразлари билан бўлишди. Қуйида XXL ўлчамидаги Lada қандай кўриниши мумкинлиги тасвирланган.