ОАВ: Трампга қарашли компания Путинга нархи 50 миллион доллар турадиган кошона совға қилмоқчи бўлган

АҚШ президенти Дональд Трампнинг The Trump Organization компанияси Россия президенти Владимир Путинга Москвада қурилиши режалаштирилган «Трамп-Тауэр» биносидан пентхаус (бинонинг энг юқори қаватида жойлашган кошонасифат хонадон) совға қилмоқчи бўлган. Бу ҳақда Buzzfeed News хабар бермоқда.

Қиймати 50 миллион долларлик бу совғадан мақсад россиялик бойларни бўлажак бинодан хонадон сотиб олишга қизиқтириш бўлган.

«Олигархлар Путин яшайдиган уйда яшаш учун қаторлашиб навбатга турган бўлишарди», деган Москвада баландлиги 100 қаватли «Трамп-Тауэр» биносини қуриш ташаббускори бўлган бизнесмен Феликс Сатер.

Трамп бу ғоядан хабардор бўлганми-йўқми, номаълум, лекин BuzzFeed’нинг ёзишича, ўша пайтда унинг адвокати бўлган Майкл Коэн бизнесменни Москва билан музокаралардан хабардор қилиб турган.

Нашрнинг АҚШ ҳуқуқни муҳофаза қилиш органларидаги манбаларга таяниб ёзишича, Коэн Россия президентининг матбуот котиби Дмитрий Песковнинг вакили билан қурилиш режасини муҳокама қилган. 29 ноябрь куни Коэн лойиҳа муҳокамаси Трамп президентликка номзод бўлганидан сўнг ҳам давом этганини тан олган.  

АҚШ президенти уни ёлғончиликда айблади. Трампнинг сўзларига кўра, Коэн қамалиш муддатини қисқартириш учун ёлғон гапирмоқда. У солиқ тўлашдан қочиш ва бошқа жиноятларда айбланмоқда.