ОАВ: «Реал» Мбаппени тарихдаги энг қимматбаҳо футболчига айлантирмоқчи

«Реал» яқин вақтлар ичида «ПСЖ» ҳужумчиси Килиан Мбаппе трансферини мавсум якунида амалга ошириш бўйича амалий ҳаракатларга ўтади, деб хабар бермоқда France Football.

Аввалроқ франциялик юлдуз «Қироллик клуби»нинг ёзги трансфер кампаниясидаги энг асосий мақсади экани хабар қилинганди. Уни харид қилиш борасида клуб президенти Флорентино Перес ва бош мураббий Зинедин Зиданнинг фикри бир жойдан чиққан.

Манба маълумотига кўра, Перес Париж клубига рад қилиб бўлмас таклиф юборишга тайёргарлик кўрмоқда: яқин ҳафталар ичида «Реал» «ПСЖ»га Мбаппе учун 280 млн евро тўлашга тайёр эканини маълум қилади.

Трансфер шу суммада амалга ошган тақдирда 20 ёшли Килиан футбол тарихидаги энг қимматбаҳо футболчига айланади. У бу борада жамоадоши Неймарнинг 2017 йили «Барселона»дан «ПСЖ»га ўтган вақтда ўрнатилган 222 млн евролик рекордини янгилаши мумкин.

Бундан аввалроқ Франциянинг бошқа бир обрўли нашри – L'Equipe Мбаппенинг «Реал»га ўтиши шартини маълум қилганди. Унга кўра, 7-рақам эгаси Мадриддан йиллик 15 млн евро маошни кўзда тутувчи таклиф олсагина, бу клуб сафига қўшилиши мумкин. Айни пайтда «қаймоқранглилар»нинг энг кўп ҳақ олувчи футболчиси Гарет Бэйлга йилига 14 млн евро иш ҳақи тўланади.