«Реал» ЕЧЛнинг бу мавсумида иккинчи бор камбэк амалга оширди. Жозе Моуринио шогирдлари 2-турда «Рома»га қарши сафар ўйинида 1:3 ҳисобини ғалабага айлантира олганди, бу сафар Грецияда АЕК билан ўйинда 1:2 ҳисобидан чиқиб кетилди.
«Реал» эса 32-дақиқада Жуд Беллингҳэмнинг маҳорати эвазига ҳисобни тенглаштирди. Марк Кукурелянинг узатмасидан кейин инглиз яримҳимоячиси турнинг энг чиройли голи муаллифига айланди: у тўпга товонида зарба бериб, дарвоза тўринини ишғол этди.
Ўйиннинг асосий воқеалари сўнгги 15 дақиқаликда бўлиб ўтди. Аввалига 75-дақиқада мезбонлар ҳимоячиси Ставрос Пилиос ҳужумга қўшилди ва Койтанинг узатмасидан кейин тўпни Куртуанинг оёқлари орасидан ўтказди – 2:1.
АЕК иккинчи бўлимда меҳмонлар дарвозаси томон тўғри йўллаган ягона зарбаси билан ғалабани илиб кетиши мумкин эди. Аммо Мбаппе ва Валверде «Реал»ни шармандаликдан қутқариб қолди. 78-дақиқада француз ҳужумчиси Дензел Думфриснинг олис устун томон узатмасига етиб борди ва мувозанатни тиклади. Ўйинга қўшиб берилган дақиқаларда эса Федерико Валверде ўз услубида олис масофадан йўллаган зарбаси билан ғалаба голини урди – 3:2.
«Реал» ЕЧЛнинг бу мавсумида гуруҳ босқичини идеал ўтказмоқда: тўрт ўйинда тўрт ғалаба. Бунгача «Лейпциг» (4:1), «Рома» (4:3) ва «Интер» (2:1) мағлуб этилганди. Мбаппе эса ҳар ўйинда гол уриб келмоқда.
Мавзуга оид
Кейинги турда «Реал» ПСВни қабул қилади, АЕК «Комо» билан ўйнайди.
«Ливерпул» дастлабки 25 дақиқада кучли босим ўтказди, «Фенербаҳче» эса Алисон қўриқлаётган дарвозага яқинлаша олмади. Андони Ираола жамоаси кучли прессинг эвазига ҳисобни очди: тўп рақиб жарима майдони атрофида олиб қўйилгач, Ниони бир тегинишда кучли зарба йўллади – тўп рикошет бўлиб дарвоза тўрига бориб тушди. Аммо ҳисоб очилганидан кейин ўйин картинаси буткул ўзгарди. Мезбонлар ҳужумларни кучайтирди, «Ливерпул» мудофаада тез-тез хатога йўл қўя бошлади. Дастлаб Қаҳвачининг зарбасидан кейин тўп дарвоза тўсинига борди, аммо ўйиннинг ярим соати ортда қолаётганида Гринвуд жарима зарбасидан ҳисобни тенглаштирди, бу вазиятда мезбонларга ҳам рикошет ёрдам берди.
Танаффусдан кейин «Ливерпул» яна ҳисобда олдинга чиқиб олди. Захирадан ўйинга қўшилган Исак тўпга илк тегинишидаёқ дарвозани ишғол этди – у Гакпонинг чап қанотдан дарвозабон майдончасига йўллаган узатмасига барчадан олдин етиб борди. Лекин Ираола шогирдлари ҳисобда олдинга чиқиб олганидан кейин яна ўйинни ташлаб юборди. Мерсисайдликларнинг собиқ футболчиси Дирк Кюйт бошқарувидаги «Фенербаҳче» (у Исмоил Карталнинг истеъфосидан кейин жамоани вақтинча бошқариб турибди) олти дақиқа ичида иккита гол урди.
Истанбулликлар рақибни стандарт вазиятлар орқали таслим этди. Жамоа таркибидаги яна бир инглиз футболчиси бўлган Браун бурчак зарбасидан кейин ҳисобни тенглаштирди, бироз ўтиб Муричи аут ташлаш орқали бошланган ҳужумда ғалаба голини урди. Тажрибали ҳужумчи рақиб жарима майдони ичида позиция учун курашда уч ҳимоячидан устун келди ва бош билан дарвозани ишғол этди.
Бу «Ливерпул» ЕЧЛнинг жорий мавсумида илк бор очко йўқотиши бўлди. Бунгача «Атлетико» (2:1), ЛАСК (6:3) ва «Вилярреал» (4:3) мағлуб этилганди.
«Фенер» учун эса бу ЕЧЛда сўнгги 11 ўйиндаги илк ғалаба бўлди. Бу оралиқда тўрт дуранг ва олти мағлубият қайд этилганди.
Кейинги турда «Ливерпул» «Брюгге» меҳмони бўлади, «Фенер» «Шахтёр» билан ўйнайди.
«Манчестер Сити» Лейпцигда зарбалар сони бўйича ютқазди (4:6), аммо танаффусга ғолиб ҳолда йўл олди. Бўлим охирларида мезбонлар ҳимоячиси Лукеба қанотдан оширилган тўпни тўсишга уриниб, ўз жамоаси дарвозасини ишғол этиб қўйди. Ҳолбуки унинг атрофида «Сити» футболчилари йўқ эди.
Танаффусдан кейин ўйин темпи ўсди. 49-дақиқада эса меҳмонлар майдон марказида тўп йўқотди ва мезбонлар тезкор қарши ҳужум уюштиришди. Ридли Баку тўп билан жарима майдонига кириб борди ва Жанлуижи Доннарумманинг ҳимоясиз қолдирилган яқин бурчагини ишғол этди – италиялик дарвозабон позиция танлашда қўпол хатога йўл қўйганди.
Ўйиннинг бир соати ортда қолганида эса Фернандес Ндиайенинг узатмасидан кейин яна инглизларни ҳисобда олдинга олиб чиқди. Аммо «РБ Лейпциг» яна жавоб қайтарди – уч дақиқа ўтиб мезбонлар марказдан ҳужум уюштиришди ва бу ҳужумни Доннарумманинг олис бурчагини аниқ нишонга олган Нуса якунлаб берди.
Шундай паллада яна Эрлинг Ҳоланд катта саҳнага чиқди. 78-дақиқада Мареска шогирдлари ўнг қанотдан ҳуум уюштиришди ва Андерсон норвегиялик ҳужумчига голли узатма етказиб берди – 2:3.
Ҳоланд учун «Лейпциг» энг севимли рақиблардан бири бўлиб қолмоқда, у ушбу жамоага қарши 9 ўйинда урган голлари сонини 13 тага етказиб қўйди.
Кейинги турда «Сити» «Наполи» билан, «Лейпциг» – «Ланс» билан ўйнайди.
«Арсенал» «Славия»га қарши ўйинда савиядаги фарқ эвазига ғалаба қозонди. Артета сўнгги бир ҳафта ичидаги учинчи сафар ўйинига аралаш таркибни ташлади ва биринчи бўлимда Йокереш аввалига Мадуэкени голли узатма билан таъминлади, бўлим охирларида эса ўзи бошлаган ҳужумни ўзи гол билан якунлади. Биринчи бўлимда мезбонлар лондонликлар дарвозаси томон тўғри борган бирорта зарба йўллай олишмади (умуман, чехлар 45 дақиқа ичида атиги бир марта зарба беришди).
Танаффусдан кейин эса Артета шогирдлари қулай ҳисобдан келиб чиқиб, хотиржамликка берилди, «Славия» ўз мухлислари қаршисида олдинга ташланишди. Райя дарвозаси қаршисида бирин-кетин хавфли вазиятлар юзага келди, иккинчи бўлимда зарбалар бўйича ҳисоб 17:4 кўринишини олди, аммо меҳмонлар ҳимояси фақат 90-дақиқага келиб ёриб ўтилди: чап қанотдан кросс узатма берилганида Райя тўпга чиқишда кечикди – Новак эса дарвозабон ҳудудида туриб дарвозани ишғол этди. Аммо «Славия»да мағлубиятдан қутулиб қолиш учун вақт қолмаганди.
«Арсенал» «Славия»га қарши мағлубиятсиз сериясини давом эттирмоқда: жами олти ўйинда 4 ғалаба ва икки дуранг. Қолаверса, «Арсенал» Чемпионлар лигасида 19 ўйиндирки асосий вақтда ютқазмаяпти: 14 ғалаба ва беш дуранг.
«Славия» эса еврокубокларда 19 ўйиндан буён ғалаба қозонмаган: олти дуранг ва 13 мағлубият. .
Кейинги турда «Арсенал» «Дортмунд»ни, «Славия» «Вилярреал»ни қабул қилади.
Сеск Фабрегас жамоаси Чемпионлар лигасини забт этишда давом этмоқда. Ушбу италиялик мутахассис ўтган турда «МЮ» билан ўйиндан кейинги матбуот анжуманида ҳисоб йириклашиб кетгач (4:1), шогирдларига тўхташни кўрсатма бергани ҳақида айтганди.
Бу сафар эса ундан бундай кўрсатма бўлмади. Турнир дебютанти бўлган «Комо» биринчи бўлимда учта гол уриш билан чекланганди, иккинчи бўлимда эса «Ланс» дарвозаси яна олти бор ишғол этилди. Жамоа ҳужумчиси Дувикас ҳет-трик муаллифи бўлди, ўтган турда 2+1 қайд этган Нико Пас бу сафар 1+2 билан кифояланди (мураббий уни эрта алмаштириб юборди).
Пас ўз голини «Тенерифе»нинг шу кунларда майдондаги тўқнашув оқибатида вафот этган ҳужумчиси Хесус де Мигелга бағишлади. Футболчи аргентиналик бўлишига қарамай, айнан Испаниянинг Тенерифе шаҳрида туғилган, отаси эса «Тенерифе» сафида ўйнаган. Ўша фожиали воқеа рўй берганида ўйинни телевизор орқали томоша қилаётганди.
Иккинчи бўлимда унинг ўрнига тушган Батурина ҳам ўз номини таблога ёздириб қўйди, Кемпф, Да Куня, Либерали ва Папаччоли биттадан гол уришди, мезбонлар эса биргина Агилярнинг голи билан жавоб қайтаришди.
9:1 – Чемпионлар лигасидаги энг йирик ҳисобдаги ғалаба бўлди. Бунгача турнир тарихида «Ливерпул»нинг «Бешиктош» ва «Реал»нинг «Малмё» билан ўйинларида 8 тўп фарқи билан қозонилган ғалабалар (8:0) қайд этилган, шунингдек «Бавария» бир ўйинда тўққиз гол урган – аммо Загребнинг «Динамо» клубига қарши ўйиндаги тўплар фарқи бу қадар катта эмасди (9:2).
Бу ғалабадан кейин «Комо» очколари сонини 9 тага етказди ва умумий турнир жадвалида кучли тўртликдан жой олди. Италияликлар 19 гол билан турнирнинг энг кўп гол урган иккинчи жамоаси бўлиб турибди (фақат «ПСЖ»да кўпроқ – 20).
Кейинги турда «Ланс» «Лейпциг» майдонида айбини ювишга ҳаракат қилади, «Комо» АЕКни қабул қилади.
«Боруссия» ва «Бетис» ўйинида биринчи бўлимда ҳисоб очилмади – асосий воқеалар иккинчи бўлимга қолдирилди. Иккинчи бўлим бошида Жоб Беллингҳэмнинг жарима зарбасидан кейин тўп қайтарилди, аммо тўпга Фабиу Силва биринчи бўлиб етиб келиб, ҳисобни очди.
Севиляликлар таслим бўлишни истамади ва кўп ўтмай ҳисоб тенглашди: Аззалзулий тўпни олис устун олдига етказиб берди, Руибал уни дарвозага тўғрилаб юборди.
Аммо мезбонлар дарҳол устунликни ўзига қайтарди: биринчи бўлимда жароҳат олган Гирасси ўрнига тушган Кацерас Силванинг узатмасидан фойдаланиб ғалаба голини урди.
Бу «Бетис» учун ЕЧЛ мавсумидаги илк мағлубият бўлди (Пеллегрини шогирдлари бунгача уч ўйинда уч ғалабага эришганди), Нико Ковач жамоаси эса энди очколар сони бўйича «Бетис»га етиб олди.
Кейинги турда «Дортмунд» «Арсенал» меҳмони бўлади, «Бетис» аутсайдер «Слован»га қарши ўйинда ғалабали йўлга қайтиши мумкин.
Норвегиядаги ўйинда турнирнинг икки дебютант жамоаси тўқнашди ва «Сабоҳ» биринчи бўлиб ўз сўзини айтди. «Викинг» майдон марказида тўп йўқотгач, Озарбойжон чемпионлари қарши ҳужум уюштирди ва ўзбекистонлик яримҳимоячи Умарали Раҳмоналиев Орфе Мбинани голли узатма билан таъминлади. Аммо мезбонлар биринчи бўлимнинг ўзидаёқ Эрик Бутҳеймнинг саъй-ҳаракатлари билан ҳисобни тенглаштирди.
Ўйиннинг ҳал қилувчи палласи эса 69-дақиқада, «Сабоҳ» ҳимоячиси жарима майдони ичида тўпни қўли билан ўйнаганида рўй берди. Қозоғистонлик дарвозабон Стас Покатилов пеналтини қайтарганди, аммо Златко Трипичнинг ўзи тўпга биринчи бўлиб етиб келди. Эйден Маккарти қизил карточка олиб, меҳмонлар озчилик бўлиб қолганидан кейин эса «Викинг» ҳисобни йириклаштириб, турнирдаги илк ғалабасини нишонлади.
Кейинги турда «Викинг»ни «Атлетико» майдонига сафар кутмоқда, «Сабоҳ» «Барселона»га қарши ўйинда ҳам йирик ҳисобда ютқазмасликка ҳаракат қилади.
«Порту» биринчи бўлимда «Наполи» дарвозаси томон йўллаган ягона зарбасини голга айлантирди. Бурчак зарбасидан кейин Беднарек бошда гол уриб ҳисобни очди. Неаполитанликлар танаффус арафасида ҳисобни тенглаштирди. Бу эпизодда «Порту» дарвозабони Диогу Кошта бир неча фантастик сейв ижро этганди, аммо ҳимоячилар тўпни ўз вақтида узоқлаштира олишмади ва Мактоминей ҳисобни тенглаштирди.
Дуранг ҳисоб иккинчи бўлим ўрталаригача сақланиб турди, кейин эса португаллар 20 дақиқа ичида италянларни шунчаки яксон этди. Испаниялик Вейга ғалаба голини кўзда ёш билан нишонлади. Кейин эса Кивёр худди Беднарек каби бурчак зарбасидан гол урди. Ўйин охирида Агеҳова пеналти ишлаб, уни ўзи аниқ ижро этди. Массимилиано Аллегри бошқарувидаги «Наполи» чўкишда давом этмоқда.
Кейинги турда «Порту» «Фейеноорд» билан учрашади, «Наполи» «Манчестер Сити» меҳмони бўлади.
«Брюгге»нинг истеъдодли ёш ҳужумчиси Тресолди Эйндҳовендаги ўйиннинг биринчи бўлими ўрталарида бурчакдан оширилган тўпни бошда дарвозага йўллаб, ҳисобни очди. Бу унинг ЕЧЛдаги бешинчи голи бўлди, фақат «Комо» ҳужумчиси Анастасиос Дувикас ундан кўпроқ гол урган, Эрлинг Ҳоландда ҳам бешта гол бор.
ПСВ эса иккинчи бўлимда ҳисобни тенглаштирди: Кодаи Санонинг зарбасидан кейин тўп рикошет орқали дарвоза тўрига бориб тушди.
Аммо иккинчи бўлим ўрталарида мезбонлар «Брюгге»га гол совға қилишди. Ҳимояда товон орқали пас беришдан кейин тўп йўқотилиши оқибатида Сейс иккинчи голли узатмасини амалга оширди – Форбш дарвозабон билан яккама-якка вазиятга чиқиб борди ва ғалаба голини урди. Белгияликлар барча кўрсаткичлар борасида ортда қолган бўлса-да (зарбалар сони бўйича 10:27, дарвоза соҳасига тўғри борган зарбалар сони – 3:9, xG бўйича 2,88 га қарши 1,73), Нидерландиядан уч очко билан қайтадиган бўлди.
Кейинги турда ПСВ «Реал» синовидан ўтади, «Брюгге» «Ливерпул»ни қабул қилади.
