Хитойнинг CCTV давлат телеканали Мадриднинг «Реал» клуби ҳужумчиси, франциялик Килиан Мбаппе билан боғлиқ можародан сўнг Испания футбол чемпионати (Ла Лига) ўйинларини намойиш этишни тўхтатди. BBC хабарига кўра, 1 ноябрь куни CCTV «Реал» ва «Расинг» ўртасидаги ўйинни эфирга узатмаган.
Можаро ўтган ҳафтада, Килиан Мбаппе журналистнинг ўзи ҳақидаги қайси мем унга кўпроқ ёқиши тўғрисидаги саволига жавобан, унинг қиёфаси «қандайдир йигит; чамаси, Хитой диктатори» билан бирлаштирилган мемни айтганидан кейин бошланди.
Мбаппе тилга олган мем Хитой Халқ Республикаси асосчиси Мао Цзэдун фотосурати асосида яратилган эди. Бу Хитойда катта шов-шувга сабаб бўлди ва оқибатда бир нечта маҳаллий компания футболчи билан шартномаларни бекор қилди. CCTV телеканалига эгалик қилувчи China Media Group (CMG) корпорацияси Хитойда Ла Лига ўйинлари трансляцияси тўхтатилганини маълум қилди.
Шундан сўнг Килиан Мбаппенинг ўзи, шунингдек, «Реал» ва Ла Лига раҳбарияти узр сўради. Хитой Ташқи ишлар вазирлиги Хитой томони «билдирилган узрни юқори баҳолашини» маълум қилди. CMG ҳам узрни қабул қилишини билдирди. Бироқ, BBC таъкидлаганидек, CCTV Ла Лига ўйинлари намойишини қачон қайта тиклаши ҳозирча номаълум.
