«Пахтакор» – «Ас Садд» ўйинидан кейин ўтказилган матбуот анжуманида қатарликлар етакчиси Хави «Пахтакор» футболчиси Жалолиддин Машариповни мақтагани футбол мухлисларининг оғзидан тушмаяпти. Мухлислар Хави ўзларини мақтагандек хурсанд бўлишгани Жалолиддинни қанчалик яхши кўришларидан нишона.
Бундай мақтовдан сўнг Жалолиддин билан суҳбат уюштирмасак бўлмасди. Машарипов суҳбат уюштириш таклифимизни қабул қилди ва «Пахтакор» стадиони меҳмони бўлиб, бугунги кунда мухлислар орасида энг кўп муҳокама қилинаётган футболчи Жалолиддин Машарипов билан суҳбатлашдик.
Видео: Mover (tas-ix)
Видео: Youtube
«Жаҳон чемпионатига чиқишимиз керак...»
Жалолиддин учун жорий мавсум жуда муваффақиятли бошланди. Йил бошида Осиё Кубогидаги ёрқин ўйиндан сўнг футболчи «Пахтакор»да ҳам чиройли ўйинлар кўрсатмоқда. Фаолиятининг ҳозирча энг юқори чўққисига чиққан Машарипов бунга фақат меҳнат эвазига эришганини айтди:
«Албатта меҳнатсиз ҳеч нарсага эришиб бўлмайди. Бизга катта футболчилар ҳам айтишарди меҳнат қилмасак натижага эришиб бўлмаслигини. Менга доим истеъдодинг бор ва унга ишониб меҳнат қилишни тўхтатиб қўйма дейишарди. Шу сабаб тўхтаб қолиш ниятим йўқ. Биз ҳали Жаҳон чемпионатига чиқишимиз керак».
«Одил Аҳмедовдан ўрнак оламан»
Ўзбек футболида ёшлар жамоасида порлаган юлдузчалар кейинчалик йўқолиб қолиши ҳолати кўп кўринади. Машарипов ёшлигида ҳам, ҳозир ҳам юқори савияда ўйнамоқда. Суҳбатдошимиздан йўқолиб қолган ёшлар қилган қайси хатоларни такрорламаганини сўрадик:
«Ёшлигида порлаб, кейин йўқолиб қолган футболчилар нега бундай ҳолатга тушганини кузатиб борардим. Ёшлигимда ота-онам яхшироқ ўйнашим кераклигини айтишарди, лекин мен уларга шошмасликларини, ҳали янада яхшироқ ўйнашимни, асосийси катта бўлгандан сўнг ёрқин ўйнаш эканини тушунтирардим.
Ёшлигимда кучим кам бўлгани учун ўзим хоҳлагандек ўйнай олмасдим. Ҳозир эса жисмоний жиҳатдан яхши ҳолатда бўлганим учун ўйиним чиқяпти. Ёшлигимда кўп футболчилардан намуна олганман. Ёшлигида порлаб йўқолиб қолганлардан ҳам. Катта футболчилардан айниқса Одил Аҳмедовдан ўрнак олганман. Чунки Одил ака инсон сифатида ҳам ўрнак қилиб кўрсатгулик.
