5 август куни ЎФА мажлислар залида Ўзбекистон миллий жамоаси бош мураббийи Фабио Каннаваро иштирокида матбуот анжумани бўлиб ўтди. Италиялик мутахассис илк бор журналистлар қаршисида ЖЧ якунларини сарҳисоб қилди ва саволларга жавоб қайтарди. Берилган жавобларидан билиш мумкинки, у маҳаллий матбуотни жиддий кузатиб боради ва ўз манзилига билдирилган танқидлардан яхши хабардор.
Тошкентга қайтмагани ҳақида
Каннаваро жаҳон чемпионатидан кейин дарҳол миллий жамоа базасини тарк этиб, дам олиш учун Италияга жўнаб кетгани ҳақидаги хабарларни рад этди.
Ўтган ой мобайнида жуда кўп ҳар хил саволлар бўлди, ҳар хил гаплар бўлди, масалан, мен тўғримда, миллий жамоа тўғрисида. Шу сабабдан олдин баъзи жиҳатларга тўхталиб ўтмоқчиман. Жумладан, шу жаҳон чемпионатидан кейин мен дарҳол Италияга дам олиш учун кетганим ҳақида гаплар бўлди. Лекин мен шуни таъкидлашим керак, мен охиригача Ню Йоркда, миллий жамоа меҳмонхонасида, футболчилар билан бирга эдим.
Ва барча билан келишган ҳолда яхши хайрлашдик ва жаҳон чемпионатидан кейин чемпионат ўйинлари дарҳол бошланмагани туфайли ушбу паузадан фойдаланган ҳолда уйга бориб келдим. Ўзбекистон чемпионати бошланиши билан мен яна Ўзбекистонга қайтиб, Ўзбекистон чемпионатини, чемпионат ўйинларини кузатишга киришдим.
Жисмоний тайёргарлик
Мураббий миллий жамоанинг асосий камчилиги ҳақида ҳам тўхталиб ўтди.
Саккиз-тўққиз ой орқага қайтадиган бўлсак, келишим билан таъкидлагандим. Биздаги мавжуд муаммолар тўғрисида, асосий ўйинчиларнинг ҳолатини яхшилаш ҳақида гапирдим. Чемпионат даражасини ошириш, умуман, Ўзбекистон футбол тизимини такомиллаштириш, бу нарсалар ҳақида жуда ҳам кўп гапирдик.
Ва ҳар доим интенсивлик суҳбатимиз марказида бўлган, яъни футболчиларнинг интенсивлигини ошириш, уларнинг юқори темпда ўйнашини таъминлаш – олдимизга қўйилган асосий мақсад бўлган.
Чунки мен тўртта жаҳон чемпионатида қатнашганман. Футболчи сифатида, тўғри мураббий сифатида биринчи марта қатнашишим, лекин мен жаҳон чемпионати темпини, интенсивлигини жуда яхши билардим. Жаҳон чемпионатдаги темпни даҳшатли темп, дейиш мумкин. Лекин кимдир айтиши мумкин, кимдир жаҳон чемпионатида осон бўлишини ўйлагандир, лекин мен жаҳон чемпионати темпи тўғрисида олдиндан огоҳлантиргандим.
Шу билан бирга, у ташкилий жиҳатдан муаммолар бўлмаганини айтиб, бунинг учун ЎФАга миннатдорчилик билдирган.
