АҚШнинг Украинадаги элчиси можародан кейин Киевдаги фаолиятини якунламоқда – ОАВ  

АҚШнинг Украинадаги элчиси Мари Йованович 20 май куни Киевдаги фаолиятини якунламоқда. Бу ҳақда АҚШ дипломатик доираларидаги манбаларга иқтибос келтирган ҳолда Zn.ua украин нашри хабар берди.

Нашр маълумотларига кўра, Йованович ҳозирда маслаҳатлашувлар учун шошилинч тарзда Вашингтонга жўнаб кетган. 11 май куни у Украинага қайтиши керак, 20 майда эса Вашингтонга батамом қайтиб кетади. Бу ҳақда 6 май куни элчихона ходимлари огоҳлантирилган. Янги элчи тайинлангунча унинг вазифаларини вақтинчалик ишончли вакил бажариб туради.  

Йованович ушбу лавозимда 2016 йилда Жеффри Пайетт ўрнини эгаллаганди.

Йованович жорий баҳорда Украина бош прокурори Юрий Луценко гўёки элчи унга жиноий таъқиб қилинмасликни сўраган шахслар рўйхатини берганини айтгандан кейин можаро марказида қолганди. Луценконинг айтишича, у 2017 йилда элчи билан учрашганда, “жиноий ишлар бўйича ўтаётган бир қатор аксилкоррупциячилар исмларини келтирган. Элчи бунга жавобан жиноий таъқибга йўл қўйиб бўлмаслигини, чунки бу аксилкоррупциячи фаолларга бўлган ишончга путур етказишини айтган.

АҚШ давлат департаментида Луценконинг сўзлари “очиқчасига уйдирма” дейилиб, инкор этилган. Кейинроқ Украина бош прокуратурасида “Йованович рўйхати” бўлмагани, унинг тавсиялари эса оғзаки кўринишда бўлгани айтилган.