Нур-Султон шаҳрида спорт курашлари бўйича жаҳон чемпионатида Ўзбекистон терма жамоасининг яна бир вакили медал олди.
-77 килограмм вазн тоифасида Ўзбекистон шарафини ҳимоя қилган Жалгасбай Бердимуратов бронза медали учун мусобақа мезбонларидан бири Асхат Дилмуҳаммедовга қарши баҳс олиб борди.
Кескин ва муросасиз кечган беллашувда Ўзбекистон вакили 3:1 ҳисобида ғалаба қозонди ва бронза медали билан тақдирланди.
Ўзбекистон терма жамоасининг -60 кг вазн тоифасидаги вакили Элмурат Тасмуратов эса эронлик Али Ризо Нежатийга 5:7 ҳисобида имкониятни бой бериб қўйди.
Ўзбекистон аёллар жамоасининг бугунги баҳсларда қатнашган уч нафар вакили ҳам муваффақиятсизликка учради. Даулетбике Яхшимуратова (-50 кг) саралаш босқичида молдовалик Эмилия Будеануни мағлуб этди (9:6), аммо кейинги босқичда украиналик Оксана Лавачга ютқазди.
Актенге Кеунимжаева (-53 кг) илк босқичда кубалик рақибига, Севара Эшмуратова (-55 кг) эса германиялик спортчига имкониятни бой берди. Бу спортчиларни енгган рақиблар ҳам финалгача етиб бора олмади ва Ўзбекистон вакилларида бронза медал учун курашиш имконияти юзага келмади.
Эслатиб ўтамиз, бунгача Нур-Султондаги жаҳон чемпионатида ўзбекистонлик курашчилардан икки нафари медал олганди, -72 килограмм вазн тоифасидаги Арам Варданян кумуш, -87 килограмм вазн тоифасидаги Рустам Ассакалов бронза медал билан тақдирланган.
Бундан аввалроқ, Бердимуратов ва Тасмуратов Токио Олимпиадасининг йўлланмасини қўлга киритгани хабар қилинганди.
