Хитойдаги коронавирус ва унинг пайдо бўлиши жойи суратлари эълон қилинди

Хитойда янги турдаги коронавируснинг илк сурати эълон қилинди. Суратни Хитойнинг патоген микроорганизмлар миллий сақлагичи эълон қилган.  

Вирус электрон микроскоп ёрдамида суратга олинган.

Шунингдек, ОАВда коронавирус пайдо бўлган жой – Ухандаги денгиз маҳсулотлари бозори сурати ҳам эълон қилинди. Сурат Daily Mail нашри томонидан эълон қилинган.

Журналистларнинг таъкидлашича, бозор денгиз маҳсулотлари бозори деб аталса-да, унда тирик ва нимталанган илонлар, кўршапалаклар, турли зотдаги итлар, товус, бўри, жайра, турли йиртқич ҳайвонлар ва ҳаттоки пингвин сотилган.  

Эпидемия бошлангандан кейин бозор ёпиб қўйилган. Касалликларни назорат қилиш ва олдини олиш маркази директори Гао Фунинг айтишича, ҳукумат “бозорда сотилган йиртқич ҳайвонларни” вирус манбаси деб ҳисобламоқда, бироқ буни ҳали тасдиқлай олмади. Таъкидланишича, бозорда ҳайвонлар бир-бири билан алоқада бўлади, улар вирусга чалинган бўлса, вируслар ўзаро генлар алмашиб, мутация қилиши мумкин.

Пекин университети олимлари коронавируснинг дастлабки манбаси Ухандаги бозорда сотилган кўршапалаклар бўлиши мумкинлиги ҳақидаги тахминни билдиришди. Кўршапалаклардан тайёрланган шўрвалар Хитойнинг баъзи ҳудудларида истеъмол қилинади. Бошқа тахминга кўра, вируснинг пайдо бўлишига илонлар сабаб ҳисобланади.