Ўзбекистон қудратли давлатлар Марказий Осиёда рақобатлашишини истамайди — Абдулазиз Комилов

«Биз Марказий Осиёни барқарор ривожланган, фаровон ва ҳамкорлик минтақаси сифатида кўришни истаймиз. Биз қудратли давлатларнинг минтақадаги қандайдир рақобатининг сиёсий оқибатларини ўзимизда ҳис қилишни асло истамаймиз», – деди Комилов АҚШ Давлат котиби Майкл Помпео бошчилигидаги делегация билан музокаралардан сўнг журналистлар учун ташкил этилган брифингда.

У Ўзбекистоннинг ташқи сиёсати «минтақада яхши қўшничилик муносабатлари ўрнатилишига асосланиши»ни таъкидлаган.

«Биз ҳеч қачон Ўзбекистонга зарар келтирадиган ҳаракатларни амалга оширмаймиз», – дея унинг сўзларини келтирмоқда Kun.uz мухбири. 

Куннинг иккинчи ярмида Тошкентда минтақа давлатлари ташқи сиёсат маҳкамалари раҳбарлари ва АҚШ Давлат котиби иштирокида «Марказий Осиё – АҚШ» («C5+1») шаклидаги вазирлар учрашуви ўтказилиши режалаштирилган.