Путин Россия конституцияси бўйича овоз бериш санасини маъқуллади

Ушбу санани ишчи гуруҳ раисларидан бири - сенатор Андрей Клишас Путин билан учрашувда таклиф қилган. 22 апрель чоршанба кунига тўғри келгани сабабли Клишас уни дам олиш куни деб эълон қилишни таклиф қилган.

Сенаторнинг таъкидлашича, бу санани танлашда мантиқ оддийгина бўлган: 19 апрелда православ пости тугайди ва Пасха нишонланади, 24 апрелда эса Рамазон ойи бошланади. “Шу сабабли 22 апрель ҳар томонлама мақбул сана”, деб айтган сенатор.

Путин учрашувда айни вақтда конституцияни ўзгартириш бўйича “жиддий ва мазмунли” 900тага яқин таклиф тушганини маълум қилган. 

Путин конституцияга нималарни киритишни таклиф қилмоқда

Россия президентининг асосий таклифлари орасида конституцияда ижтимоий кафолатлар ва уларнинг халқаро ҳуқуқдан устуворлигини мустаҳкамлаш, Давлат кенгаши ролини кенгайтириш, президент лавозимига номзоднинг сайловларгача Россияда муайян вақт яшаган бўлиши муддатини ошириш ва ҳукумат аъзоларини тасдиқлашнинг янги қоидалари бор.  

Тузатмалар бўйича овоз бериш қандай ўтади

Овоз бериш қандай ўтиши ҳозирча номаълум, ушбу жараённинг боришини тузатмалар ҳақидаги қонун лойиҳасига иккинчи ўқилишида киритишга ваъда берилган.  

Россия думасининг давлат қурилиши бўйича қўмитаси умуммиллий овоз бериш учун давлат хизматлари портали, масофадан туриб овоз бериш ва кўп вазифали марказлар қўлланиши мумкинлигини маълум қилган.

Овоз беришдаги иштирок даражасини ошириш учун уйдан туриб овоз беришга рухсат беришмоқчи. Бундан ташқари, муддатдан аввал овоз бериш имконияти муҳокама қилинмоқда.

Конституцияга барча тузатмалар, жумладан президент ваколатларига тегишлилари овоз беришга якун ясалгандан кейиноқ кучга кириши лозим.