Россия ва Украина ўртасида АҚШ воситачилигида Абу-Дабида ташкил этилган тинчлик музокараларининг навбатдаги раунди якунига етди. Бироқ можарони ҳал қилишда сезиларли силжишга эришилмади.
Forbes нашрининг ёзишича, томонлар асирларни кенг кўламда алмашиш бўйича яна бир бор келишиб олган бўлса-да, Россия—Украина уруши билан боғлиқ уч асосий масала — Украина ҳудудлари, узоқ муддатли хавфсизлик кафолатлари ҳамда ўт очишни тўхтатиш механизмларининг бирортаси бўйича ҳам битимга эришолмади.
1. Ҳудудий масала
Путин бу ҳудудлар Россияга тегишли эканини даъво қилиб, Украина кучларини Луганск, Донецк, Запорожье ва Херсон вилоятларидан қўшинларини олиб чиқиб кетишга бир неча бор чақирган эди.
Шу билан бирга, таҳлилчиларнинг маълумотларига кўра, мазкур тўрт вилоят ҳудудининг бир қисмини ҳануз Украина кучлари назорат қилмоқда. Шунга қарамай, Россиянинг Украина ҳудудларига нисбатан позицияси ўзгармасдан қолмоқда. Россия делегацияси раҳбари, президент ёрдамчиси Владимир Мединский музокараларда: “Россия ерининг ҳар бир қаричи Россияга қайтарилади”, — деб баёнот берди.
АҚШ таклифларидан бирида “Донбасс устидан тўлиқ назорат ўрнатишга Россияга имкон бериш мақсадида Украинанинг маъмурий чегараларини қайта кўриб чиқиш” кўзда тутилган эди. Бироқ Зеленский Украина “кўчмас мулк объекти эмас”лигини айтиб, Россиянинг ушбу ҳудудларни ўз назоратига бериш ҳақидаги талабларини рад этди. Бунинг ўрнига Украина томони амалдаги фронт чизиғи бўйлаб ўт очишни тўхтатиш тарафдори эканини билдирди. Абу-Дабидаги тинчлик музокаралари давомида томонларнинг ҳеч бири мазкур масалалар бўйича ўз позициясини ўзгартирмади.
2. Узоқ муддатли хавфсизлик кафолатлари
Музокаралар жараёни давомида Украина ўз суверенитети ва ҳудудий яхлитлигини ҳимоя қилиш учун ишончли, юридик жиҳатдан мажбурий бўлган келишувларга эришишга ҳаракат қилди. Америкалик музокарачилар ҳам Украина учун хусусан, Шимолий Атлантика шартномасининг 5-моддасига (коллектив мудофаа тўғрисида) ёки 4-моддасига (альянс аъзоларидан бирига таҳдид юзага келганда маслаҳатлашувлар ўтказишни назарда тутувчи) таянган ҳолда, НАТО намунасидаги тузилмани яратишни таклиф этди.
Россия эса ўзгача позицияда туриб, Украинага НАТО аъзолиги берилмаслиги кераклигини таъкидлади. Маълумотларга кўра, Мединский Абу-Дабидаги тинчлик музокараларида ушбу позицияни яна бир бор тилга олиб, Россия Украинанинг ҳар қандай ҳарбий иттифоққа қўшилишига қарши эканини билдирган.
