Британияда коронавирус бор-йўқлигини уй шароитида текширишга имкон берувчи тест ишлаб чиқилди

Коронавирусга янги тест вируснинг бор-йўқлигини 30 дақиқада аниқлашга ёрдам беради. Уни ўтказиш учун 120 долларлик портатив қурилма ҳамда бурун ва томоқдан мазок олиш учун ҳар бири 5 доллар турувчи тасмалар тўплами керак бўлади.

Фото: EPA

Тест Лондондаги Брюнел университети, Ланкастер университети ва Суррей университети олимлари томонидан ишлаб чиқилган. Бу тестнинг афзаллиги шундаки, уни уй шароитида ўтказиш ҳамда касалликни унинг илк аломатлари пайдо бўлишидан аввалроқ аниқлаш мумкин. Бу ҳақда Tech Crunch нашри хабар берди.

Тест муаллифларининг таъкидлашича, у организмда вирусга антитаналарни эмас, балки вирус РНК борлигини таҳлил қилади. Бу эса инфекцияни унинг биринчи аломатлари пайдо бўлишидан анча олдин аниқлаш имконини беради.

“Бу сизда коронавирус бор-йўғлигини уй шароитида текшириш мумкинлигини англатади. Диагностик қурилмани смартфонга улаб, фойдаланувчи ўзида инфекция бор-йўқлигини била олади”, деб айтишган олимлар.

Тест негизида Филиппинда товуқларда вирус бор-йўқлигини текширишда қўлланган технология ётади. Британиялик мутахассислар бу технологияни одамлар учун мослаштиришган.

Айни вақтда ушбу тестни оммавий равишда ишлаб чиқариш режалаштирилмоқда. У бир неча ҳафта ичида сотувга чиқарилиши кутилмоқда. Ушбу тестнинг қўлланиши ҳозирда текширилмаётган одамларни қамраб олишга ва пандемиянинг ҳақиқий кўламини баҳолашга имкон беради.

Тайёрлаган Шуҳрат Раҳимов

#тест #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.