Америкалик муҳандислар ҳеч қачон сирпанмайдиган пойабзал таглигини ишлаб чиқишди

Массачусетс технология университети муҳандислари иштирокида яратилган материал устига илон териси кўринишида туширилган нақшли юпқа ва қайишқоқ пўлат пластинкага ўхшайди. Ушбу материалнинг асосий сири – бир-бири устига чиққан ўнлаб тангачалар бўлиб, улар япон санъати — киригами қоидалари бўйича терилган. 

“Бундай материалдан ишланган таглик ясси ҳолатда силлиқ бўлиб қолади, бироқ кичик эгилишда ҳам, мисол учун, оғирлик товондан оёқ учига ўтганда тангачалар “ҳурпайиб”, ер билан тишлашади. Шу билан бирга улар пойабзалга сирпанмаслиги учун баъзида тақиладиган тишлардан анча камроқ оғирликка эга”, деб айтишган ихтиро муаллифлари. 

Муҳандисларнинг таъкидлашича, бундай таглик сирпанишнинг тишлардан кўра самаралироқ олдини олади. Бундан ташқари, у пойабзал ва сирт ўртасидаги ишқаланишни 20-35 фоизга оширади.

Ғоя муаллифларининг таъкидлашича, бундай пластинанинг пойабзалда қўлланиши йиқилиш хавфини анча камайтиради ва шу билан кўплаб ҳаётларни сақлаб қолади ва жароҳат олганларни даволашга кетадиган миллиардлаб долларни тежаб қолиш имконини беради.