Болливуд юлдузи, 34 ёшли актёр Сушант Сингх Ражпут Мумбайдаги уйида жонсиз ҳолда топилди. Бу ҳақда NDTV телеканали хабар берди.
Полицияда тахмин қилинишича, актёр ўз жонига қасд қилган бўлиши мумкин. Таъкидланишича, бир ҳафта аввал актёрнинг собиқ менежери ҳам вафот этган.
Бу орада актёрнинг полиция билан суҳбатлашган яқинлари ва дўстлари Ражпут тушкун ҳолатдалиги ёки соғлиғи ёхуд молиявий томондан муаммолари борлигидан шикоят қилмаган.
Актёр “Ҳаётимдаги уч хато” (Kai Po Che! 2013) фильмидан кейин машҳурликка эришгач, уни таниқли режиссёрлар ўз фильмларига таклиф қила бошлашган. Ражпут, шунингдек, сериалларда ҳам роллар ижро этган. Умумий ҳисобда актёр 20дан кўпроқ фильмда, жумладан “Пикей” (PK, 2014), “М.С.Дхони: айтилмаган воқеа» (M.S.Dhoni: The Untold Story, 2016), “Драйв” (Drive, 2019) каби фильмларда суратга тушган. Унинг иштирокидаги янги фильм май ойида экранларга чиқиши керак бўлган, бироқ пандемия сабабли қолдирилган.
Актёрнинг ҳамкасблари ва мухлислари ижтимоий тармоқларда ўз таъзияларини билдиришган. Жумладан, Ҳиндистон бош вазири Нарендра Моди ҳам твиттерда актёр вафоти билан боғлиқ изоҳ қолдирган. Унинг фикрича, Ражпут ўз йўли билан кўпчиликни илҳомлантириб, кино тарихида ўзига хос ўчмас из қолдирди.
“Ёш актёр жуда эрта ҳаётдан кетди. У телевидение ва фильмларда муваффақият қозонганди. Унинг кўнгилочар соҳада порлаши кўпчиликни илҳомлантирди. Мен унинг ўлимидан карахтга тушдим. Менинг ўйларим унинг оиласи ва мухлислари билан бирга”, деб ёзган Моди.
Таъкидланишича, актёр ижтимоий тармоқлардаги охирги постини ўз онасига бағишлаган.
