Сотув офисида эса кун ора жанжал - 2025 йилда топширилиши ваъда қилинган уйлари битишидан ҳамон дарак йўқ фуқаролар пулларини талаб қилмоқда. Хонадонларнинг вақтида топширилмаганидан шундоқ ҳам сиқилиб юрган харидорларга компания таъсисчилари ўртасида пайдо бўлган низо "дард устига чипқон" бўлди. Сотув офисидаги «Imarat» сўзи ҳам «Imtiyaz» сўзига алмашиб қолган.
«Imarat Devlopment» номи остида уйлар қуриб беришни ваъда қилган Марат Хайруллаевич ва унинг мижозлари ўртасидаги вазият тобора жиддийлашмоқда. Тадбиркорнинг қатор лойиҳалари арзон нарх ва қулай тўлов шартлари билан жозибали кўрсатилгани боис юзлаб одамлар уларга пул тўлаган. Бироқ ваъдалар бажарилмаётгани, уйлар белгиланган муддатларда топширилмагани кўплаб харидорлар норозилигига сабаб бўлмоқда.
Бундан ташқари, мижозларни ишонтириб, қоп-қоп ваъдалар билан савдоларни амалга оширган Марат Ҳамдамов Sergeli City’дан тортиб Bristol City’гача бўлган лойиҳалардан четлаштирилгани иддао қилинмоқда. Kun.uz юзага келган вазиятга ойдинлик киритиш мақсадида яна бир «новостройка» можаросини ўрганди.
Таҳририятга мурожаат қилган Шоҳиста Ризаеванинг сўзларига кўра, компанияда ўзаро ички низо юзага келган, хонадонларни топшириш муддатлари ҳам узайтирилган. У бундан буён қурувчиларга ишонмаслигини, тўлаган пуллари қайтарилишини талаб қиляпти.
Бошқа бир мурожаатчи Дилором Ютаева сўзларига кўра, у 2024 йил 6 январ куни шахсан Марат Ҳамдамовнинг қўлидан шартнома олган ва шу вақтгача 400 млн сўм тўлаган. Уй 2025 йил 30 октябргача топширилиши керак бўлган, аммо амалда бундай бўлмаган. Ютаева ҳам тўлаган пули қайтарилишини талаб қиляпти.
Мурожаатчи Жаҳонгир Муҳиддиновнинг таъкидлашича, у харид қилган хонадонлар 2025 йил декабрда топширилиши керак бўлган, тўловларни эса тўлиқ амалга оширган. Бироқ уйлар белгиланган муддатда битмагани боис қурилиш жараёни ҳақида маълумот олишга уринган, аммо компания вакилларидан аниқ жавоб ололмаган. Кечиккан кунлар учун мижозларга компенсация ваъда қилинган бўлса-да, шартномада белгиланган миқдор жуда кам.
Дилноза Тўйчибоевага кўра, у 2024 йил 3 февралда уй сотиб олиш бўйича шартнома тузиб, хонадони битишини кутиб келган. Бироқ қурилиш кечикавергач, компанияга ишончи йўқолиб, шартномани бекор қилиш ва пулини қайтариб олишга қарор қилади. Аммо компания вакилларининг ваъдаларига ишониб яна кутишда давом этади. Шундан кейин кутилмаган ҳолатга дуч келган: компания шартномани бекор қилиб, уч йилдан бери пулини тўлаб келган хонадонни бошқа харидорга сотиб юборган.
Kun.uz вазиятга ойдинлик киритиш мақсадида ўзини «Imarat Devlopment» ташкилотининг директори сифатида таништирган Олим Маматовга бир қатор саволлар билан юзланди. Компания вакили айрим блокларда қурилиш ва таъмирлаш ишлари давом этаётганини, лойиҳалар уч босқичда топширилиши режалаштирилганинини айтди. У кечикишлар ва Марат Ҳамдамовнинг лойиҳалардаги иштироки билан боғлиқ саволларга таъсисчилар ўртасидаги келишмовчиликларни сабаб қилиб кўрсатди.
