Ўрта Чирчиқда хорижий мамлакатлардан олиб келинадиган картошка навлари маҳаллийлаштирилаётгани айтилди

Қайд этилишича, Тошкент вилоятининг Ўрта Чирчиқ туманида жорий йилда 2 минг гектардан 40437 тонна ҳосил олиш мўлжалланган.

«Пандемия шароитида эса такрорий майдонларга экиладиган картошка учун тезпишар уруғлик талаб этилади. Бунинг учун ҳозир фермер хўжаликлари ва бошқа қишлоқ хўжалиги корхоналари ўзидаги мавжуд уруғлардан фойдаланаётган бўлса, уруғликнинг қолган қисми Россия Федерацияси, Қозоғистон ва Голландия давлатларидан олиб келиняпти.

Табиийки, бу етиштирилаётган картошка нархининг қимматлашишига олиб келади. Шу боис туманимизда “GS-BIO” масъулияти чекланган жамияти хориждан келтирилаётган картошкаларнинг янги тезпишар навларини яратиш бўйича фаолиятини бошлади», дея Ўртачирчиқ тумани ҳокимининг қишлоқ ва сув хўжалиги масалалари бўйича ўринбосари Дониёр Турғуновнинг сўзларини келтирмоқда Kun.uz мухбири.

“GS-BIO” масъулияти чекланган жамияти раҳбари Боситхон Абдуфаттоҳовнинг таъкидлашича, Жанубий Кореянинг INVITRO биотехнологик инновацион тизими асосида шу кунгача четдан олиб келинаётган “Santo”, “Picasso”, “Navskiy” картошка навларининг уруғлари маҳаллийлаштирилди. У 2020 йилда ана шундай усулда 5 миллион дона уруғлик етиштириш мўлжалланаётгани, 2021 йили 50 минг тонна, 2023 йилга бориб эса 500 минг тонна ишлаб чиқарилиши кутилаётганини билдирди.

«Лойиҳани амалга ошириш учун 5 миллион доллар миқдорида хориж инвестицияси жалб қилинган. Шундан 100 минг долларга корхона лабораторияси учун хориждан асбоб-ускуналар олиб келинган. Айни пайтда лабораторияда 10 нафар ходим ишлаётган бўлса, бизга ажратилган 5 гектар майдонда иссиқхона комплекси ва уруғлик картошкани сақлаш учун омборхона қуриб битказилгач, яна 100 та иш ўрни яратилади», дейди Боситхон Абдуфаттоҳов.

Тошкент вилояти ҳокимлиги ахборот хизмати маълумотларига кўра, ҳозирги пайтда ҳудудда ғалладан бўшаган майдонларда такрорий экин сифатида картошка етиштириш масаласига алоҳида эътибор қаратилмоқда. Маълумки, картошка “иккинчи нон” сифатида ҳар бир хонадонда энг кўп ишлатиладиган сабзавот маҳсулоти ҳисобланади. Жорий йилда вилоятда жами 18 минг гектар майдонга картошка экиш белгиланган бўлиб, унинг 6 минг гектари асосий майдонга, 12 минг гектари эса ғалладан бўшаган майдонларга такрорий экин сифатида экилади. Йил якунида жами майдонлардан 533,3 минг тонна, такрорий майдонлардан эса 244 минг тонна картошка олиш режалаштирилган. Агар бу кўрсаткичларни ўтган йилга нисбатан таққосласак, 59 фоизга кўп эканлиги маълум бўлади. Бунинг сабаби пандемия шароитида озиқ-овқат маҳсулотлари хавфсизлигини таъминлашдир.

Аввалроқ Қишлоқ хўжалиги вазирлиги матбуот котиби Нигора Хўжаева АОКАда ўтказилган брифингда 2020 йилда республика бўйича 83 минг гектар ерга картошка экилгани, йил якунига қадар картошкадан 2 млн 916 минг тонна ҳосил олиниши кутилаётганини айтган эди.

6 май куни «Республикада картошка етиштиришни кенгайтириш ва уруғчилигини янада ривожлантириш чора-тадбирлари тўғрисида»ги президент қарори қабул қилинган, унга кўра Ўзбекистонда картошкачиликка ихтисослаштириладиган туманларда картошкачилик кластерлари ва кооперациялари ташкил этилиши белгиланган эди.

Қишлоқ хўжалиги вазири ўринбосари Саидкамол Хўжаев 17 апрель куни АОКАда бўлиб ўтган брифингда карантин даври чўзилиб кетса ҳам қишлоқ хўжалиги маҳсулотлари таъминотида тақчиллик бўлмаслигини, тиббий меъёрлар бўйича аҳолининг картошкага бўлган эҳтиёжи 1 млн 784 минг тоннани ташкил этишини маълум қилди.