«Bir qopda 15 kg.gacha hosil olish mumkin» - qopda kartoshka yetishtirayotgan andijonlik yosh tadbirkor

Rahmonberdi devor yonidagi ozgina bo‘sh joyda qop ichida kartoshka ham yetishtirmoqda.

Tadbirkorlikka qiziqishini aytgan 18 yoshli Rahmonberdi asosan ko‘chatchilik bilan shug‘ullanadi. Erta bahorga pomidor, bodring va karam ko‘chatlarini chiqarib, 1,5 million so‘m foyda ko‘ribdi.

«Issiqxonani ham o‘zim tol yog‘ochlaridan yasaganman. Ichiga pomidor va bodring ekib, ertaki hosil yetishtirdim. Natijada ko‘chatlar va tepasiga yopilgan plyonka xarajatlaridan tashqari, 1,5 mln so‘mdan ortiq foyda oldim.

Tomorqada bo‘sh joyning o‘zi yo‘q. Devor tagida ozgina yer bor edi. O‘sha joyni tekislab, qopda 100 qop ichida kartoshka yetishtirishga urindim. Bu uslub juda oz joyni egallar ekan. Kartoshka ekilgan qop ichiga tuproq, mahalliy o‘g‘it va yog‘och qipig‘i solingan. Cho‘michlab suv qo‘yib, parvarishlayapman.

Shu uslubda kartoshka yetishtirgan dehqonlarning aytishicha, bitta qopda 15 kilogrammgacha kartoshka hosilini yetishtirish mumkin. Agar men 100 qopning har biridan 8 kilogrammdan kartoshka olsam, xudo xohlasa, 800 kilogramm hosil bo‘ladi. Bozorda bir kg kartoshka narxi 5 ming so‘m, bu esa qo‘shimcha 4 million so‘m daromaddir», deydi 18 yoshli tadbirkor yigit.

Bizni yosh Rahmonberdining shijoati, yangilikka bo‘lgan intilishi quvontirdi. Kelgusida yetuk tadbirkor bo‘lib, el-yurtga ko‘p foydasi tegishini tilab qolamiz.

Elmurod Ermatov,
Ahrorbek Yoqubjonov