Италия Бельгиядан ўтди, Англия Украинани тор-мор этди ва Данияни кутмоқда. 1/4 финалнинг асосий воқеалари

Швейцария иккинчи бўлимда рақибнинг хатосидан фойдаланди (Шақири гол муаллифи), аммо кўп ўтмай бир киши камчилик бўлиб қолди (Фройлернинг четлатилиши баҳсли бўлди) ва пенальтилар сериясигача туриб берди (дисквалификация туфайли ўйнай олмаган Чака яна нутқ ирод этди). Унаи Симон испанларни яримфиналга олиб чиқди ва Зоммердан кўра кўпроқ зарбани қайтариб, бу оқшомнинг энг яхши футболчисига айланди.

Италиянинг рекорд ғалабаси

Бельгия — Италия — 1:2 (1:2)
Голлар: Барелла (Верратти), 31 (0:1). Инсинье, 44 (0:2). Лукаку, 45+2 — пенальти (1:2).
Бельгия: Куртуа, Вертонген, Вермален, Алдервейрелд, Менье (Шодли, 69. Прат, 73), Витсель, Тилеманс (Мертенс, 69), Доку, Де Брейне, Азар, Лукаку.
Италия: Доннарумма, Ди Лоренцо, Кьеллини, Бонуччи, Спинаццола (Эмерсон, 79), Барелла, Жоржиньо, Верратти (Кристанте, 74), Кьеза (Толой, 90+1), Иммобиле (Белотти, 74), Инсинье (Берарди, 79).
Огоҳлантиришлар: Верратти, 20. Тилеманс, 21. Берарди, 90.
Ҳакамлар: Винчич. Кланчник, Ковачич (барчаси — Словения).
ВАР: Данкерт. Гиттельманн, Фриц (барчаси — Германия), Гиль (Польша).
2 июль. Мюнхен. «Алльянц Арена» стадиони. 12984 томошабин.

Евро-2020нинг асосий икки фаворити учрашувида Италия Бельгиядан устун келди. Роберто Манчини жамоаси ўйинни назорат қилди, ўз фаоллиги ва прессинги билан рақибга ўйин бермади, қарши ҳужумларда илдамроқ ҳаракат қилди, рақиб ҳужумларини тўхтатди ва вазиятлардан фойдаланди.

Мюнхенда кечган чорак финалидаги барча голлар танаффус арафасидаги 15 дақиқаликда киритилди. Барелланинг голи барчани оёққа турғазди, жумладан, ҳужум вақти айёрлик билан дарвоза олдига йиқилиб олган Иммобилени ҳам. Инсинье эса яна бир чиройли юришини чиройли зарба билан якунлаб ҳисобни иккитага оширди. Лукаку пенальтидан ҳисобни қисқартирди, у иккинчи бўлимда яна бир гол уришга яқин келди. Аммо Спинаццола форварднинг зарбасини дарвоза чизиғи олдида орқа турган ҳолда тўсиб қолди. Лекин ушбу қаҳрамон ҳимоячи кейинроқ оғир жароҳат олиб, турнирдаги иштирокини якунлади.

Бельгия ўз олтин авлоди билан яна бир йирик турнирни финалга етиб бормасдан якунлади. ФИФА рейтингидаги етакчи, турнирнинг асосий фаворити саналган Роберто Мартинес жамоаси керакли паллада ўзининг энг кучли ўйинини кўрсата олмади. Жароҳатланган Эден Азар жамоа турнирни тарк этишини захирадан кузатди, Де Брейне эса оғир жароҳати бор бўлатуриб, майдонда охиригача курашди.

Италия рекордлар қўйишда давом этади: бу сафарги Европа чемпионати циклида қаторасига 15 ғалаба (бельгияликлар 14да тўхташди), шундан бештаси — турнирнинг финал босқичида. Шунингдек, Манчини жамоаси мағлубиятсиз сериясини 32 ўйинга етказиб қўйди (бу борада жаҳон рекорди Бразилия ва Испанияда — 35тадан).

Дания яна яримфиналда

Чехия — Дания — 1:2 (0:2)
Голлар: Дилэйни, 5 (0:1). Дольберг, 42 (0:2). Шик, 49 (1:2).
Чехия: Вацлик, Цоуфал, Калас, Челустка (Брабец, 65), Боржил, Ҳолеш (Янкто, 46), Соучек, Барак, Масопуст (Крменчик, 46), Шевчик (Дарида, 80), Шик (Видра, 79).
Дания: Шмейхел, Вестергор, Кристенсен (Андерсен, 81), Кьер, Стрюгер Ларсен (Васс, 71), Ҳейберг, Дилэйни (Йенсен, 81), Меҳле, Брэйтуэйт, Дольберг (Поульсен, 59), Дамсгор (Нергор, 60).
Огоҳлантиришлар: Крменчик, 84. Калас, 86.
Ҳакамлар: Кайперс. ван Рукел, Зайнстра (барчаси — Нидерландия).
ВАР: ван Букел. Блом (иккиси — Нидерландия), Мели, Иррати (иккиси — Италия).
3 июль. Боку. Олимпийский стадиони. 16306 томошабин.

Дания Бокудаги ўйинда Чехияни мағлуб этди. Каспер Ҳюлманд шогирдлари Россия (4:1) ва Уэльс (4:0) устидан қозонилган ёрқин ғалабалар ортидан яна бир муҳим ўйинни ўз фойдаларига ҳал этишди. Шимолликлар 29 йил ичида илк бор йирик турнир яримфиналига чиқишди, бундан юқори натижа фақат 1992 йилда қайд этилган — ўшанда тасодифан турнирга келиб қолган данияликлар Европа чемпиони бўлишганди.

Данияликлар бурчак зарбасидан кейин тезкор гол уришди, бу вазиятда Дилэйни рақиб жарима майдонида бўш қолдирилганди. Танаффус арафасида иккинчи гол урилди — Меҳленинг қанотдан берган ажойиб пасини 1/8 финалда уэльсликларга дубл қилган Дольберг дарвозага жойлаб қўйди.

Чехлар биринчи бўлимга қўшиб берилган дақиқаларда ҳисобни қисқартиришди, Шик ўзига хос тарзда Шмейхел қўриқлаётган дарвоза олдига ёриб кириб, турнирдаги бешинчи голини урди. Ушбу форвард Евро-2020 тўпурарлари рўйхатида Роналду билан тенглашиб олди, аммо у энди голлари сонини ошира олмайди. Данияликлар иккинчи бўлимда ғалабали ҳисобни сақлаб қолишга эришди.

Англияда йирик ғалаба

Украина — Англия — 0:4 (0:1)
Голлар: Кейн, 4 (0:1). Магуайр, 46 (0:2). Кейн, 50 (0:3). Хендерсон, 63 (0:4).
Украина: Бушчан, Забарний, Матвиенко, Кривцов (Циганков, 35), Караваев, Сидорчук (Макаренко, 64), Зинченко, Шапаренко, Миколенко, Яремчук, Ярмоленко.
Англия: Пикфорд, Уокер, Магуайр, Стоунс, Шоу (Триппьер, 65), Санчо, Маунт, Райс (Ҳендерсон, 57), Филлипс (Беллингем, 65), Стерлинг (Рэшфорд, 65), Кейн (Калверт-Льюин, 73).
Ҳакамлар: Бриҳ. Борш, Лупп (барчаси — Германия).
ВАР: Фриц. Гиттельманн, Дингерт, Данкерт (барчаси — Германия).
3 июль. Рим. Олимпийский стадиони.

Англия Римдаги ўйин танаффусидан кейин Украина дарвозасига голларни қаторлаштирди ва йирик ҳисоб билан яримфиналга чиқди. Андрей Шевченко жамоаси биринчи бўлимдаги ўйинини давом эттирмоқчи бўлди, аммо ҳимоя чизиғи вакиллари хатолари ўйин тақдирини тезда ҳал қилди.

Англия сафида Евро-2020 ўйинларида шанба кунига қадар фақат икки футболчи гол урганди: Стерлинг — учта, Кейн эса нимчаорк финалда Германияга қарши ўйинда терма жамоанинг турнирдаги тўртинчи голини уриб, масалани ҳал қилганди. Бунгача 4 ўйинда жами 4 гол урган Гарет Саутгейт жамоаси украинлар дарвозасига бир ўйинда яна шунча гол йўллади. Стерлинг ва Кейн 4-дақиқадаёқ тезкор голни уюштиришди, танаффусдан кейин Стерлингнинг товони орқали пас қабул қилиб олган Шоу қанотдан Магуайрнинг бошига тўпни қўндириб берди, шу ишни Кейн билан ҳам такрорлади, кўп ўтмай Ҳендерсон Маунтнинг бурчакдан узатган тўпини дарвозага жойлади. Бир ўйинда бош билан учта гол — бу Европа чемпионати рекорди.

Саутгейт жамоаси Евро-2020да бирорта гол ўтказмаган ягона жамоа бўлиб қолмоқда. Инглизлар Лондонга қайтади, улар футболни уйига қайтаришмоқда. Барча ҳал қилувчи ўйинларга «Уэмбли» мезбонлик қилади: биринчи яримфиналда 6 июль куни Италия ва Испания ўйнайди, иккинчиси — 7 июль куни Англия ва Дания ўртасида ўтказилади.