ЖЧ-2026 саралаши. Англияда йирик ғалаба, янгиланган Литвадан ажойиб камбэк ва бошқа натижалар

24 март оқшомида Европада ЖЧ-2026 саралаш босқичи доирасида учта гуруҳда 2-тур ўйинлари ўтказилди.

K гуруҳи

Кейн Клозега етиб олди

Англия – Латвия 3:0
Голлар: Рис Жеймс 38, Ҳарри Кейн 68, Эберечи Эзе 76.
Англия: Жордан Пикфорд, Рис Жеймс, Марк Гехи, Эзри Конса, Майлс Люис-Скелли (Кайл Уокер 79), Деклан Райс (Жордан Ҳендерсон 79), Жуд Беллингҳэм (Фил Фоден 67), Жаррод Боуэн (Эберечи Эзе 61), Морган Рожерс, Маркус Рэшфорд (Кёртис Жонс 79), Ҳарри Кейн.

Албания – Андорра 3:0
Голлар: Манай 9, 19, Узуни 90+2

Томас Тухел Англия миллий жамоаси бош мураббийи сифатидаги иккинчи ўйинида олдинги ўйиндаги бошланғич таркибдан тўрт футболчини алмаштирди. Германиялик мутахассис турли комбинацияларни синаб кўрмоқда. Рақибларнинг савияси бунга имкон беради. Лекин Латвияга қарши ўйиннинг биринчи бўлимида Гутковский инглизларни жазолаб, ўткир бурчакдан бўш дарвозани нишонга олганида, Пикфорд ва Геҳининг ўзаро тушунмовчилиги қимматга тушган бўларди.

Бўлим охирида эса «Челси» ҳимоячиси, икки йилдан ортиқ вақт давомида асосий жамоадан чақирув олмаган Рис Жеймс жарима зарбасини ажойиб ижро этиб, ўзининг миллий жамоадаги илк голини урди ва Тухелнинг ишончини оқлади. Бош мураббий ишонч билдиришда давом этаётган «Арсенал»нинг 18 ёшли ҳимоячиси Люис-Скелли эса ушбу жарима зарбасини ишлаганди.

Иккинчи бўлимда эса Кейн ҳар бир ўйин учун мажбурий пунктни бажариб, навбатдаги голини урди. Бу сафар чиройли комбинация Райснинг идеал узатмасидан сўнг Ҳарри бўш қолган дарвозани ишғол қилиши билан якунланди. Бу «Бавария» форвардининг миллий жамоалар миқёсидаги 71-голи бўлди ва у германиялик Мирослав Клозе билан тенглашиб олди. Ушбу оқшомдаги сўнгги сўзни эса янги авлод вакили айтди, захирадан ўйинга қўшилган Эзе ўзини кўрсатиб, «уч шерлар» сафидаги илк голини нишонлади. Инглизлар жамоасига янги қон олиб кираётган Тухел саралаш босқичи стартидаги икки ўйинда юз фоизлик натижа қайд этди, жами беш гол урилиб, дарвоза дахлсизлиги сақлаб қолинди.

Олдинги турда инглизлар қаршисида ожиз қолган албанлар эса бу турда ўз мухлислари кўз ўнгида Андоррани йирик ҳисобда таслим этди. Энди K гуруҳида Англия 6 очко билан пешқадамлик қилмоқда, Албания ва Латвияда 3 тадан очко мавжуд.

7 июн. Андорра — Англия, Албания — Сербия.
10 июн. Латвия — Албания, Сербия — Андорра.

Босния ва Полша ҳам йўқотишсиз кетмоқда

G гуруҳи

Литва – Финландия 2:2
Голлар: Армандас 39, Гвидас 69 – Кайринен 3, Йоэл 17 пен.

Биринчи турда литваликлар гуруҳ фаворити бўлмиш Полшага жиддий муаммо туғдирганди, уйда финлар билан кечган ўйинда эса тезкор гол ўтказиб юборилди. Ўтган турда Малтага ғалаба келтирган голга (1:0) муаллифлик қилган Антман бу ўйинда илк голли вазиятни яратди, Поҳянпалонинг зарбасидан кейин ҳимоячи тўпни чизиқ устида тўхтатиб қолди, қайтган тўпга эса Кайринен етиб келди. Кўп ўтмай йўқ жойдан пеналти қўйилгач, Литва икки тўп фарқи билан ортда қола бошлади.

Аммо Эдгарас Янкаускаснинг янгиланган жамоаси таслим бўлмади. Бўлим охирида Армандас Кучис яқин бурчакка зарба йўллаб, ҳисобни қисқартирди. У Словениянинг сенсацион равишда Конференциялар лигаси чоракфиналига чиққан «Селе» клубининг асосий юлдузи ҳисобланади. Литвалик ҳужумчи ушбу турнирда саккизта гол урди. Иккинчи бўлимда узоқ масофадан ажойиб зарба йўллаб, ҳисобни тенглаштирган Гинейтис эса «Торино» сафида А Серияда ўйнамоқда. Яқинда у «Милан»га қарши ўйинда туринликларга ғалаба келтирганди. Шундай экан, бу циклда литваликлар кўпчиликка бошоғриқ бўлади.

Полша – Малта 2:0
Голлар: Свидерский 27, 51

Каррагер эса полшаликлар ҳужумини тўхтата олмади. Бу иборада ҳеч қандай хатолик йўқ, чунки Малта миллий жамоасида бу саралаш циклида Англия миллий жамоаси ва «Ливерпул»нинг собиқ футболчиси Жейми Каррагернинг ўғли — Жеймс иштирок этмоқда. Кичик Каррагер профессионал даражадаги фаолиятини Шотландиянинг иккинчи дивизионида «Инвернесс» сафида бошлаганди, бу мавсумда эса ижарадан «Уиган»га қайтди. Бу клуб ҳозирда Англия футболидаги учинчи дивизионда қатнашмоқда. Жеймс ушбу орол давлат миллий жамоасига Малтада туғилган ва кейин Буюк Британияга кўчиб бориб, инглиз аёлига уйланган бобосининг қони туфайли жалб этилди.

Варшавадаги ўйинда Левандовски захирада қолдирилган бўлса-да (у иккинчи бўлимда майдонга тушди) меҳмонлар кучли прессинг остида қолишди ва Жеймс ҳам ўзини яхши томондан кўрсата олмади. Иккинчи голли ҳужум айнан унинг тўп узатишдаги хатосидан кейин бошланди.

7 июн. Малта — Литва, Финландия — Нидерландия.
10 июн. Финландия — Полша, Нидерландия — Малта.

H гуруҳи

Босния – Кипр 2:1
Голлар: Демирович 22, Хайрадинович 56 – Питтас 45+2.

Сан-Марино – Руминия 1:5
Голлар: Дзаннони 67 – Чеволи автогол 6, Попеску 44, Марин 55 пен., Янис Ҳажи 75 пен., Денис Алибек 90+4.

Босния март ойидаги ўйинларни юз фоизлик натижа билан ўтказди, кипрликлар билан ўйиндаги камтарона натижа эса алдамчи. Болқон жамоаси кўплаб вазиятлар яратди ва кўп ҳужум қилди, аммо ҳар бир бўлимда биттадан гол билан кифояланди. Биринчи бўлим ўрталарида стандарт вазиятдан узатма ва Демирович ҳаводаги тўпни олис устун томон йўллаши билан ҳисоб очилганди. Унга ассистентлик қилган Хайрадинович иккинчи бўлим бошларида ғалаба голига муаллифлик қилди. Аслида, душанба куни Босния минимал дастурни бажарди. Муҳими, Руминияда ғалаба қозониш эди (1:0). Руминлар эса кутилмаган мағлубияттдан сўнг бор аламини Сан-Маринодан олишди (5:1).

7 июн. Босния — Сан-Марино, Австрия — Руминия.
10 июн. Руминия — Кипр, Сан-Марино — Австрия.