Зеленский: Украина АҚШдан 50 млрд долларлик қурол сотиб олмоқчи

Бу ҳақда Украина президенти Володимир Зеленский журналистлар билан учрашувда баёнот берди, деб хабар бермоқда РБК-Украина.

Зеленскийнинг фикрича, Украина АҚШнинг аввалги президенти Жо Байден томонидан маъқулланган ҳарбий ёрдам пакетини тўлиқ ишлатиб бўлмаган.

«Байден давридаги ёрдам ҳақида. Аниқ муддатларни эслай олмайман, ростини айтсам. Менимча, ёрдам доимий равишда белгиланган бирор муддатга боғланмасдан келаётганди. Шунинг учун буни вақт билан боғлашга зарурият йўқ эди. Бу ерда маблағ миқдори муҳим. У тўлиқ ишлатилдими? Йўқ. Биз ҳануз таянадиган ресурслар бор», — деди Зеленский.

Шу билан бирга, у Украина Америка томонига қўшимча ёрдам пакети учун расмий сўров юборганини маълум қилди. Украина ушбу пакетни харид қилишни хоҳлайди.

«Биз Америка томонига йирик бир пакетни тақдим этдик — биз уни сотиб олмоқчимиз. Қандай шаклда бўлмасин. Унга тўловни қандай оширишимиз бизнинг формат, ўзимиз ҳал қиламиз», — деди президент.

Зеленскийнинг таъкидлашича, АҚШдан кутилган келгуси ҳарбий ёрдам пакетини Украина бепул сўрамаган.

«Биз буни хавфсизлик кафолати сифатида ҳам кўрамиз. Биз бу ёрдамни хавфсизлик келишувига боғлашни хоҳлаймиз. Жуда оддий: бизга пакет беринглар — биз тўлаймиз. Бу пакетда ҲҲҲ тизимлари ва бизга зарур бўлган бошқа воситалар бор. Биз ушбу ёрдамни хавфсизлик кафолати деб ҳисоблаймиз. Бу нарсалар бир-бирига шу тарзда боғлиқ», — деди у.

Давлат раҳбари маълум қилишича, у АҚШ президенти Доналд Трамп билан ҳаво ҳужумидан ҳимоя воситалари тўғрисида гаплашган ва ундан 10 млрд долларлик мудофаа воситаларини сотишни сўраган.

«Мен унга телефон орқали шундай дедим: ҳеч бўлмаса 10 млрд долларлик пакет беринг. Бу ҳимоя — уруш тугаганидан кейинги ёрдамдир, хавфсизлик кафолатидир, чунки Украина осмон ҲҲҲ тизимлари билан ёпилган бўлади. Биз турли форматларга, турли воситаларга тайёрмиз. Биз 30, ҳатто 50 миллиард доллар топишга ҳам тайёрмиз», — деб таъкидлади Зеленский.