Жонсоннинг таъкидлашича, НАТО — тинчлик ва мудофаа альянси.
Буюк Британия бош вазири Борис Жонсон НАТО Россияга хавф солмаслиги тўғрисида РФ президенти Владимир Путинга кафолат беришга тайёрлигини айтди.
«Агар президент Путин тайёр бўлса, олдинда бир йўл бор. У кўраётганини таъкидлаётган таҳдидларни муҳокама қилиш мумкин. Чунки аслида бу таҳдидлар хаёлот эканлигини ҳаммамиз биламиз. Бу НАТОни таҳдид солувчи альянс деб ўйлайдиган Кремлнинг хато тасаввури маҳсули», — деди у.
Жонсон НАТО — тинчлик ва мудофаа альянси эканлигини таъкидлади. У Ғарб буни исботлаш учун Путин билан ишлашга ва Россия президенти эҳтиёж сезаётган кафолатларни беришга тайёрлигини қўшимча қилди.
Жонсоннинг сўзларига кўра, Россия 2014 йилда Қримни қўшиб олмагунига қадар Германиядан шарқдаги ҳеч бир ерда НАТОнинг мунтазам қўшинлари бўлмаган. У НАТО қўшинлари Польша ва Болтиқ мамлакатларига 2017 йилда жойлаштирилгани, аммо уларнинг сони Россия учун хавфли эмаслигини айтди.
Россия НАТОнинг шарққа қараб кенгаймаслигини ҳамда собиқ иттифоқ давлатларининг альянсга қўшилмаслигини талаб қилмоқда. НАТО эса альянсга кириш ҳар бир мамлакатнинг ўз хоҳиши эканлигини билдирган.
