Россияда «жисмоний шахслар - хорижий агентлар» рўйхати кенгайтирилди 

Россия Адлия вазирлиги мухолифатчи сиёсатчи Илья Яшин, блогерлар Максим Кац ва Вероника Белоцерковская, телебошловчи Татьяна Лазарева ва Коррупцияга қарши кураш фондининг (ККФ) собиқ ходими, Алексей Навалнийнинг сафдоши Руслан Шаведдиновни «жисмоний шахслар - хорижий агентлар» рўйхатига киритди. Бу ҳақда 22 июль, жума куни мамлакат Адлия вазирлиги матбуот хизмати хабар берди.

Вазирлик маълумотларига кўра, уларнинг беш нафари ҳам сиёсий фаолият билан шуғулланади ва Украинадан маблағ олади.

Руслан Шаведдинов ўзининг реестрга киритилишини 22 июль куни нишонлаган туғилган кунига «совға» деб атади. 

Илья Яшин «РФ қуролли кучлари тўғрисида қасддан ёлғон маълумот тарқатиш» (РФ ЖКнинг 207.3-моддаси) иши бўйича 12 сентябргача ҳибсга олинган, қарор Москванинг Басманний туман суди томонидан қабул қилинган. Максим Кац ҳозирда Россиядан ташқарида. 

16 март куни РФ Тергов қўмитаси Вероника Белоцерковскаяга Яшин билан бир хил модда бўйича жиноий иш қўзғатганини маълум қилди. Блогер Россия ҳукумати томонидан халқаро қидирувга берилди ва сиртдан ҳибсга олинди. У Францияда яшайди. 

Татьяна Лазарева Испанияда. 

Руслан Шаведдинов апрель ойида РФ ИИВ томонидан қидирувга берилган, у ҳам Россияни тарк этган.

Адлия вазирлиги рўйхатида жами ўндан ортиқ шахс бор. Илгари у 3 июнь куни янгиланган ва унга тадбиркор Евгений Чичваркин киритилган эди. 

Аввалроқ РФ президенти Владимир Путин «хорижий агентлар» тўғрисидаги янги қонунни имзолаганди, унга кўра, бу мақом чет элдан молиялаштирилмаётган шахсларга ҳам берилиши мумкин – уларнинг фаолияти «хорижий таъсир» остида эканлигини эълон қилиш етарли бўлади. Қонун 14 июль куни ҳуқуқий ахборотнинг расмий интернет-порталида эълон қилинди. У 1 декабрдан кучга киради.