Ижтимоий тармоқларда “Ўзтрансгаз” АЖ мансабдор шахсларига нисбатан жиноят иши қўзғатиш ҳақидаги қарор нусхаси тарқалди. Шу йил 12 май куни имзоланган ҳужжатга Иқтисодий жиноятларга қарши курашиш департаменти ўтказган текширувлар асос бўлган.
Ҳолатга Бош прокуратура томонидан изоҳ берилди. Унга кўра, мазкур жиноят иши Бош прокуратура томонидан назорат тартибида ўрганилганида, терговга қадар текширув ҳаракатлари “тўлақонли ўтказилмасдан”, қарор “барвақт қабул қилингани” аниқланган.
“Шу сабабли жиноят иши қўзғатиш ҳақидаги қарор 16 май куни бекор қилиниб, қўшимча равишда терговга қадар текширув ҳаракатлари олиб бориш учун юборилган”, – дейилади маҳкама хабарида.
Баёнотда терговга қадар текширув ўтказиш ва жиноят иши очишга асос бўлган ҳолатлар юзасидан муносабат билдирилмаган.
Жиноят иши қўзғатилишига нима сабаб бўлган?
Интернетда тарқалган, “Ўзтрансгаз” мансабдорлари устидан жиноят иши очиш ҳақидаги қарорни Департаментнинг суриштирув бўлими бош суриштирувчиси У.Ҳошимов қабул қилган, унинг бу қарорини бўлим бошлиғи Ш.Раҳматов маъқуллаган.
Бундан ташқари, бош прокурорнинг биринчи ўринбосари Баҳриддин Валиев жиноят иши қўзғатишга розилик бериб, қарорга имзо қўйган.
Қарордан маълум бўлишича, Иқтисодий жиноятларга қарши кураш департаменти ва Солиқ қўмитаси томонидан “Ўзтрансгаз” АЖ фаолияти бўйича солиқ текшируви ўтказилган.
Қайд этилишича, 100 фоиз “Ўзтрансгаз” АЖ таъсисчилигида ташкил этилган “Transgaztexnikabutlash” МЧЖга кўрсатган хизматлари ва бажарган ишлари учун “Хўжалик юритувчи субъектлар фаолиятининг шартномавий-ҳуқуқий базаси тўғрисида”ги қонунининг 24- ва 35-моддалари талабларига риоя қилмаган ҳолда, асоссиз равишда 2017 йилнинг январ–август ойларида 3,1 млрд сўм ва 2018 йилнинг феврал–апрел ойларида 4,2 млрд сум, жами 7,4 млрд сўм ортиқча мукофот пуллари тўлаб берилган.
Шунингдек, “Ўзтрансгаз” ва Буюк Британиянинг Виржиния ороллари (офшор ҳудуд)да рўйхатдан ўтган “AVARD INVEST LP” компанияси ўртасида 2019 йилнинг 5 ноябр куни қиймати 280 млн долларлик (табиий газ олинган кундаги Марказий банк курси бўйича 2,6 трлн сўм) 2 млрд куб метр табиий газ олди-сотдиси бўйича тузилган шартномага мувофиқ, “Lukoil Overseas Supply and Trading Ltd” компанияси томонидан “Ўзтрансгаз” АЖга 280 млн долларлик 2 млрд куб метр табиий газ етказиб берилган.
