Суд Путиннинг кетишини талаб қилган депутатлар кенгашини тарқатиб юборишни маъқуллади

Санкт-Петербургнинг Смолнинский туман суди шаҳар прокуратурасининг «Смолнинское» муниципал тузилмаси (МТ) кенгаши депутатларини тарқатиб юбориш имконияти ҳақидаги талабини қаноатлантирди, деб хабар берди муниципал депутат Никита Юферев 13 сентябр, сешанба куни «Фонтанка» нашрига. «Бу суд қарори губернаторга муниципал кенгашни тарқатиб юбориш имкониятини беради. Лекин биз қарорга эътироз билдирамиз, у кечиктирилади», - дея таъкидлади Юферев.

Шаҳар прокуратураси муниципал кенгаш уч ой давомида фаолият кўрсатмаётганини асос қилиб, бир йилдан кўпроқ вақт олдин — 2021 йил июль ойида уни тарқатиб юборишга рухсат бериш талаби билан мурожаат қилганди. «Фонтанка»нинг ёзишича, бунга кенгаш раҳбари Григорий Ранковнинг бетоблиги сабаб бўлган. 

«Фақат мухолифат депутатлари Давлат думасидан президент Владимир Путинга импичмент эълон қилишни сўрашга қарор қилгандан кейингина иш олдинга силжиди», деб таъкидлайди нашр.

7 сентябр куни Санкт-Петербург «Смолнинское» муниципалитети депутатлар кенгаши Путинни давлатга хиёнат қилгани учун лавозимидан четлатиш чақириғи билан Давлат думасига мурожаат юборишга қарор қилди. Улар президентнинг қарорлари оқибатларини бунинг аломатлари деб аташган: Россия армияси бўлинмаларининг йўқ қилиниши, Россиянинг ёш ва меҳнатга лаёқатли фуқароларининг ўлими ва жароҳати, Россия иқтисодиётига зарар етказиш ва НАТОнинг кенгайиши, шунингдек, Украина армиясининг замонавий Ғарб қурол-аслаҳалари билан жиҳозланиши, бу - унинг «демилитаризация» мақсадига зиддир. 

Кейинроқ Москва ва Санкт-Петербургнинг 18 округидаги муниципал депутатлар чақириққа қўшилди. 12 сентябр куни уларнинг Путин истеъфосини талаб қилган петицияси эълон қилинди, 14 сентябрга қадар 60 дан ортиқ муниципал депутатлар уни имзолади.

Ташаббусни қўллаб-қувватлаган Санкт-Петербург муниципалитет депутатларидан бири Никита Юферевнинг айтишича, 8 сентябр куни унга ва «Смолнинское» муниципалитетининг бошқа депутатларига полициядан қўнғироқ бўлган. Уларга нисбатан Россия армиясини «обрўсизлантириш» бўйича протоколлар тузилди.