YouTube Россия Федерациялар кенгашининг каналларини блоклади

YouTube сервиси Россия Федерациялар кенгаши ва «Вместе РФ» парламент телеканали каналларини блоклади. «Федерациялар кенгаши ва «Вместе-РФ» телеканалининг YouTube видеохостингидаги аккаунтлари блокланди, барча маълумотлар қайта тиклаш имкониятисиз ўчириб ташланди», — дейилади 18 октябр, сешанба куни Федерациялар кенгашининг Telegram-каналида. Видеохостингга эгалик қилувчи Google канал маъмурларига аккаунтлар «экспорт чекловлари ва санкцияларни қўллаш билан боғлиқ қоидаларга мувофиқ» блокланганини тушунтирди, деб ёзади Федерациялар кенгаши Америка компаниясининг сўзларига асосланиб.

Парламентнинг юқори палатаси саккиз йилдан ортиқ фаолият юритиб келаётган блокланган каналларда 200 мингдан ортиқ обуначи ва 20 минг видео борлигини қайд этди. Аккаунтларда Федерациялар кенгаши йиғилишларининг жонли трансляциялари, сенаторларнинг шарҳлари ва Россия тарихига оид дастурлар эълон қилинган. «Федерациялар кенгаши ва «Вместе-РФ» воқеаларнинг бундай ривожланишини назарда тутган ҳолда, дўстона бўлмаган мамлакатларнинг ҳаракатларидан қатъи назар, барча видеоконтент фойдаланувчилар учун мавжуд бўлишини таъминлаш мақсадида маҳаллий платформаларни фаол ишлаб чиқди», дея маълум қилди Федерациялар кенгаши.

Аввалроқ Федерациялар кенгашининг ахборот сиёсати ва ОАВ билан ўзаро ҳамкорлик комиссияси раҳбари Алексей Пушков Роскомнадзор ва Бош прокуратурага YouTube'ни Россияда блоклашни таклиф қилмоқчи эканлигини маълум қилганди.

Ўз навбатида, Федерациялар кенгашининг халқаро ишлар бўйича қўмитаси раиси ўринбосари Андрей Климов бу масалага мувозанатли ёндашишга чақирди. «Афсуски, сўнгги ўн йилликларда жуда кўп одамлар ва ташкилотлар ўзларининг бизнес фаоллигини ушбу платформа билан боғлашди. Буларнинг барчасини жуда эҳтиёткорлик билан ўлчашимиз керак. Биз ўз оёқ ва қўлларимизга ўқ отмаслигимиз керак», - дейди Климов.

18 октябр куни Россия Давлат думаси реал вақт режимида ялпи мажлисларнинг онлайн трансляциясини чеклаш тўғрисида қарор қабул қилгани маълум бўлди. Думадаги манбанинг ТАСС'га маълум қилишича, бундай қарор «йиғилишлар кун тартибининг муҳим қисми Украинада жанг қилаётган аскар ва офицерларни қўллаб-қувватлаш чора-тадбирларини муҳокама қилиш» ва «урушни қонунчилик йўли орқали таъминлашга боғлиқ масалалар» билан изоҳланади.

Федерациялар кенгашининг конституциявий қонунчилик ва давлат қурилиши қўмитаси раҳбари Андрей Клишас парламент юқори палатаси мажлисларининг онлайн трансляцияси давом этишини айтди. «Федерациялар кенгаши ва қўмиталари йиғилишлари трансляция қилиниши аввалгидек давом этади. Парламент фуқаролар ва оммавий ахборот воситалари учун очиқ бўлиши керак», деб ёзади у.