Байден ва Шольц Украинадаги вазиятни муҳокама қилди

Германия ҳукумати расмий вакили сўзларига кўра, телефон суҳбатида Украинани Россия агрессиясига қарши курашда қўллаб-қувватлаш масаласи асосий мавзуга айланган. 

Икки давлат етакчиси бу қўллаб-қувватлаш «самарали, барқарор ва яқиндан мувофиқлаштирилган бўлиши керак» деган фикрга қўшилди, дейилади хабарда.

Бундан олдин АҚШ Урушни ўрганиш институти (ISW) Кремль келгуси 6 ой ичида ташаббусни қайта қўлга киритиш ва Украинанинг оператив муваффақиятлари сериясига чек қўйиш учун «ҳал қилувчи стратегик ҳаракатларга» тайёрланаётган бўлиши мумкинлигини билдирганди. 

Таҳлилчилар бундай ҳаракатлар учун бир-бирини истисно қилмайдиган бир нечта вариантни кўриб чиқяпти. Шу тариқа, Россия армияси Луҳанск вилоятида йирик ҳужум уюштиришга ҳаракат қилиши мумкин, деб ҳисоблайди ISW экспертлари. 

Шу билан бирга, Россия қўшинлари Херсон ёки Запорижжя вилоятларида ҳужум уюштириши даргумон ва бу ҳудудларда мудофаа амалиётларига устувор аҳамият беришади, дейди таҳлилчилар.

Ҳисобот муаллифлари яна бир «ҳал қилувчи стратегик ҳаракат» сифатида Россия томонининг Украина қарши ҳужумини қайтариш ва Украинани ташаббусдан маҳрум қилиш, унинг механизациялашган кучлари муҳим қисмини йўқ қилиш бўйича эҳтимолий уринишини келтирган.