Полша Россиядаги консуллик агентлигининг ёпилишига жавоб қайтаришини эълон қилди

Варшава Смоленскдаги Полша консуллик агентлигининг ёпилишига худди шундай қадам билан жавоб қайтаради. Бу ҳақда 14 июл, жума куни Полша ҳукумати раҳбари Матеуш Моравецкий матбуот анжуманида маълум қилди. 

«Биз мунтазам равишда Россиянинг тажовузкор дипломатик хатти-ҳаракатлари ҳақида маълумот оляпмиз», — деди Моравецкий. «Агар охир-оқибат Россия бизнинг ваколатхоналаримизни тугатишга киришса, биз ҳам худди шундай жавоб берамиз», — дея вазирлар маҳкамаси раҳбарининг сўзларидан иқтибос келтирган Reuters агентлиги. 

Полшанинг Смоленскдаги консуллик агентлиги 31 августда тугатилади, унинг вазифалари Москвадаги элчихонага ўтади, дея аниқлик киритди расмий Варшава.

14 июл куни Полшанинг Россия Федерациясидаги элчиси Кшиштоф Краевский Россия Ташқи ишлар вазирлигига чақирилди, унга Смоленскдаги консуллик агентлиги ёпилганлиги ҳақида нота топширилди. 

Москва Варшавани «Полшада аккредитациядан ўтган россиялик дипломатларга қарши провокацион ҳаракатларда», «Россия дипломатик мулкини тортиб олишда ва Россия элчихонаси маблағларини ўзлаштирганликда», Киевни қўллаб-қувватлаганликда ва «совет ҳарбий ёдгорлик мероси»ни йўқ қилишда айблади. 

Консуллик агентлиги Полша томони учун аҳамиятли обидалар жойлашган вилоят ҳудудида ишлаган. Гап «Катин» ёдгорлик мажмуаси ва 2010 йилда ўша пайтда Полша президенти бўлган Лех Качинский вафот этган Смоленскдаги авиаҳалокат жойи ҳақида кетмоқда.