Ўзбекистон ҳукумати делегацияси жорий йилнинг 18 июль куни Озарбойжонга ташриф буюрди.
Боку шаҳрида 19 июль куни Озарбойжон президенти Илҳом Алиев Ўзбекистон бош вазири Абдулла Арипов бошчилигидаги мамлакатимиз ҳукумати делегациясини қабул қилди.
Суҳбат аввалида Ўзбекистон бош вазири Озарбойжон президенти Илҳом Алиевга давлат раҳбари Шавкат Мирзиёевнинг саломи ва эзгу тилакларини етказди.
Ўз навбатида, Озарбойжон раҳбари мамлакат етакчисини ва бутун халқни президент сайловидаги ишончли ғалабаси билан яна бир бор табриклаб, халққа тинчлик-осойишталик, фаровонлик ва равнақ тилади.
Ўзбекистон бош вазири мамлакатда бўлиб ўтган сайловдан сўнг Шавкат Мирзиёевни биринчи бўлиб президент Илҳом Aлиев табриклаганини билдириб, бу давлат раҳбарлари ва мамлакатлар ўртасидаги дўстлик ва қардошлик намунаси эканини таъкидлади.
Қайд этилганидек, олий даражадаги учрашувлар якунида эришилган келишувлар изчил амалга ошириляпти. Ўзаро товар айирбошлаш ҳажми йилдан-йилга ошиб боряпти. Нефт ва газ, автомобилсозлик, қишлоқ хўжалиги, ипакчилик ва тўқимачилик саноати ҳамда бошқа тармоқларда қўшма кооперация лойиҳалари ҳаётга татбиқ этилмоқда.
