Озарбойжон президенти Илҳом Алиев дунёда фақат иккита қудратли давлат – Хитой ва АҚШ борлигини айтди.
“Улар дунёдаги энг қудратли икки давлатдир, учинчиси йўқ”, — деди у “Янги Озарбойжон” партиясининг VIII съездида қилган чиқишида.
Алиевнинг таъкидлашича, Боку бир вақтнинг ўзида Вашингтон ва Пекин билан стратегик ҳамкорлик ўрнатган: Хитой билан стратегик ҳамкорлик тўғрисидаги декларация, АҚШ билан эса стратегик хартия имзоланган.
“Бу нима дегани? Бизга бўлган ишонч, бизга бўлган муносабат, сўзимизга бўлган ишонч. Дунёда бизнинг сўзимиз имзомиздек қадрли эканини билмайдиган одам қолмаган. Нима десак, ўша гапимизда турамиз. Ҳеч қачон икки ёқлама ўйин ўйнамаганмиз. Ҳеч қачон бирор давлатга нисбатан иккиюзламачилик, риёкорлик қилмаганмиз. Ҳолбуки, биз бундай муносабатларга кўп марта дуч келганмиз, бугун ҳам дуч келяпмиз. Аммо биз ҳеч қачон улардек бўлмаймиз. Биз ўзимизни ҳурмат қиладиган инсонлармиз, биз қадр-қиммат билан яшаймиз, сиёсатимизни ҳам қадр-қиммат билан юритамиз”, деди Озарбойжон президенти.
