2024 йилда Ўзбекистонга Россиядан бир миллионга яқин сайёҳлар келиши кутилмоқда

Рус оммавий ахборот воситалари Россиядан Ўзбекистонга сайёҳлар оқимининг кўпайиши ҳақида ёзмоқда, деб хабар қиляпти "Дунё".

Фото: Kun.uz

Хусусан, РИА "Новости"ахборот агентлиги томонидан тарқатилган мақолада таъкидланишича, Ўзбекистон Туризм қўмитаси маълумотларига кўра, 2024 йилда Россиядан бир миллионга яқин сайёҳ келиши кутилмоқда ва республика ҳукумати ушбу мамлакатдан сайёҳлар оқимини кўпайтириш устида фаол ишламоқда.

Қўмита маркетинг бўлими бошлиғи Азиз Миржалиловнинг РИА "Новости"га айтишича, Россия туризм бозори Ўзбекистон учун стратегик бозор ҳисобланади. "Бизнинг олдимизга жуда катта вазифалар қўйилган. Шулардан бири — жорий йилда Россиядан бир миллионга яқин сайёҳни жалб этишдир", — дея Азиз Миржалилов сўзларидан иқтибос келтирган нашр.

Қайд этилишича, жорий йил январ ойида Ўзбекистон президентининг тегишли қарори билан республикага, жумладан, Россиядан хорижий сайёҳларни жалб этиш чора-тадбирлар дастури тасдиқланган.

"Вестник Кавказа" нашрида эълон қилинган ушбу мавзудаги мақолада таъкидланишича, 2023 йилда Россиядан Ўзбекистонга сайёҳлар оқими 714 минг кишини ташкил қилган. "Бу ундан олдинги йилги кўрсаткичдан 25,8 фоизга кўп. Россия Ўзбекистонга энг кўп меҳмонлар ташриф буюрадиган 5 та давлат қаторига киради", — деб ёзган "Вестник Кавказа".