Фон дер Ляйен ва Макрон Хитой билан ҳамкорликни муҳим деб атади

Париж ва Брюссел жаҳон сиёсатининг асосий муаммоларини ҳал қилишда Пекин билан биргаликдаги саъй-ҳаракатларга интилмоқда. «Хитой ЕИ учун йирик глобал муаммоларни ҳал қилишда муҳим аҳамиятга эга», деди Еврокомиссия раҳбари Урсула фон дер Ляйен 6 май, душанба куни Елисей майдонларида Франция президенти Эммануэл Макрон ва Хитой етакчиси Си Жинпинг билан уч томонлама учрашувда. У иқлим ўзгаришига қарши биргаликда курашни мисол қилиб келтирди.

«Бундан ташқари, Хитой ва Европа Иттифоқи тинчлик, хавфсизлик ва қоидаларга асосланган халқаро тартибнинг самарали ишлашидан манфаатдордир», деди фон дер Ляйен. Бу, айниқса, ҳозирги таранг халқаро вазиятни ҳисобга олган ҳолда яққол кўринади, дея қўшимча қилди у. Еврокомиссия раҳбари Европа Иттифоқи ҳам, Хитой ҳам икки томонлама яхши муносабатларга интилишига ишонч билдирди. 

Шу билан бирга, Брюссел ва Пекин ўртасидаги муносабатлар бозорга кириш ва савдо билан боғлиқ муаммолар туфайли мураккаблашмоқда, деди фон дер Ляйен. У бу фарқлар Париждаги учрашув мавзуси эканини таъкидлади. 

Макрон: Мулоқот ҳар қачонгидан ҳам зарур 

Эммануэл Макрон, шунингдек, ҳозирги халқаро вазиятда Европа-Хитой мулоқоти «ҳар қачонгидан ҳам зарур» эканини таъкидлади. «Биз тарихнинг бурилиш нуқтасида турибмиз ва бу биздан тизимли муаммоларни ҳал қилишни талаб этади», деди у. 

Шу билан бирга, Франция президентининг сўзларига кўра, гап иқтисодий муносабатлар ва ҳамма учун ягона қоидаларни таъминлаш, шунингдек, бўлиниш мантиғини енгиш ҳақида бормоқда. «Қитъамизнинг келажаги Хитой билан мувозанатли муносабатларни ривожлантиришни давом эттириш қобилиятимизга боғлиқ бўлади ва биз шунга интиламиз», — дея қўшимча қилди Макрон. 

Музокаралар чоғида биринчи навбатда Европа Иттифоқи ва Хитой ўртасидаги савдо алоқалари, адолатли рақобат ҳамда бозорларга кириш ва сармояга эътибор қаратилади, деди Франция раҳбари. Шундан сўнг томонлар Украина ва Яқин Шарқдаги можароларни муҳокама қилади, чунки бу «иккита йирик инқироз бўлиб, уларда ўртамиздаги мувофиқлаштирилган ҳаракатлар мутлақо муҳим», дея қўшимча қилди у. 

Сининг 5 йил ичида Европага биринчи ташрифи 

Ўз навбатида, Си дунё ҳозир нотинч даврларни бошдан кечираётгани, шунинг учун Хитой ва Европа шериклик ҳамда ўзаро ишончни чуқурлаштириши кераклигини айтди. У барча мамлакатлар учун тинчлик ва қулай ривожланишга эришиш учун Европа-Хитой муносабатларининг барқарор ва соғлом ривожланишига кўмаклашишга чақирди. 

Париждаги уч томонлама музокаралар ёпиқ эшиклар ортида ўтди. Бу Си Жинпингнинг сўнгги беш йил ичида Европага илк ташрифи.