Россияда Алишер Моргенштернга нисбатан жиноий иш очилди

Россияда «чет эл агентлари» учун қоидаларга риоя қилмагани учун рэперга нисбатан жиноий иш очилган.

Фото: Екатерина Чеснокова/РИА Новости

Россияда рэпер Алишер Моргенштернга нисбатан «чет эл агенти» (Россия Федерацияси Жиноят кодексининг 330.1-моддаси 2-қисми) вазифасини бажармагани учун жиноий иш очилди. Бу ҳақда 8 сентябр, якшанба куни ҳуқуқ-тартибот идораларига таяниб, Россия давлат агентлиги «РИА Новости» ёзди.

Агентлик суҳбатдошининг тушунтиришича, Моргенштерн узоқ вақт давомида ўзининг Telegram ва YouTube каналларида махсус белгисиз материалларни чоп этиб келган. Илгари прокуратура рэперга нисбатан жиноий иш қўзғатишни талаб қилиб, йил давомида у икки марта «чет эл агенти» қоидаларини бузгани учун маъмурий жавобгарликка тортилганини, бироқ ижтимоий тармоқлардаги постларига белги қўйишни бошламаганини билдирганди.

Моргенштерн 2022 йил май ойида «чет эл агенти» сифатида тан олинган. Бунга артистнинг Yoola Labs Ltd. компанияси - блогерларни тарғиб қилувчи YouTube ҳамкорлик тармоғидан пул эвазига амалга оширган сиёсий фаолияти сабаб бўлган. Жиноят кодексининг 330.1-моддаси 2-қисми бўйича мусиқачи икки йилгача озодликдан маҳрум этилиши мумкин.

Айни дамда Алишер Моргенштерн Россиядан ташқарида ва яқинда берган интервюсида мамлакатга қайтиш нияти йўқлигини айтди. «Россиядаги одамлар мени яхши кўришади, мени ёмон кўрувчи ёвузлар борлигини ҳам биламан», деди у.

Хонанда Монеточкага нисбатан худди шундай модда билан жиноий иш очилган

6 сентябр, жума куни Москва прокуратураси ўзининг Telegram-каналида хонанда Монеточка (Елизавета Гирдимова)га нисбатан «чет эл агенти» вазифасини бажармаганлиги учун Россия Федерацияси Жиноят кодекси 330.1-моддаси 2-қисми билан жиноят иши қўзғатилганини маълум қилди.

Июн ойи ўрталарида пойтахт прокуратураси хонанданинг қилмишига жиноий-ҳуқуқий баҳо берганини маълум қилганди. Идора маълумотларига кўра, «чет эл агенти» фаолиятини бузгани учун йил давомида икки марта протоколлар тузилган Монеточка ижтимоий тармоқларда хабарлар ва материалларни «улар чет эл агенти вазифасини бажарувчи шахс томонидан яратилгани ва (ёки) тарқатилганлигини кўрсатмасдан тарқатишда давом этган».