Трамп Британиянинг Чагос архипелагини Маврикийга топшириш тўғрисидаги қарорини тасдиқлади

Архипелагдаги энг катта Диего-Гарция ороли АҚШга ижарага берилган ва у ерда Британия—Америка авиабазаси жойлашган.

Фото: Shutterstock

АҚШ президенти Доналд Трамп Британия ҳукуматининг Чагос архипелагини Маврикийга қайтариб бериш тўғрисидаги қарорини тасдиқлади, деб хабар бермоқда The Telegraph.

«Айни вақтда Маврикий ҳукумати билан келишувни якунлаш ва битимни имзолаш устида иш олиб боряпмиз. Тушунишим бўйича, АҚШ билан ушбу масала муҳокама қилинганидан кейинги ҳозирги босқичда у фақат биз ва Маврикий ҳукуматига тааллуқли», — дейди Буюк Британия ҳукумати раҳбари Кир Стармер канцеляриясидаги манба.

Маврикий 1814 йилдан бошлаб Британия мустамлакаси бўлган ва 1968 йилда мустақиликка эришган. Чагос архипелаги эса 1965 йилда Маврикийдан ажратиб олинган, у вақтда мамлакат Британия мустамлакаси эди. Британия уни 3 миллион фунтга сотиб олган ва Ҳинд океанидаги ўз ери деб эълон қилган. Архипелагдаги энг катта Диего-Гарция ороли АҚШга ижарага берилган ва у ерда Британия—Америка авиабазаси ташкил этилган эди.

2024 йил 3 октябр куни Буюк Британия Чагосни Маврикийга топшириши бўйича келишувга эришилган. Шу билан бирга, Диего-Гарция оролидаги авиабаза сақлаб қолинади. Лондон ва Порт-Луи битим имзолаган бўлиб, унга мувофиқ авиабаза 99 йил давомида ижарада бўлади. Қўшма Штатлар мазкур қарорни қўллаб-қувватлади.

#Маврикий #Чагос