iPhone янги дизайни, Siri’да кечиктирилган ўзгаришлар, iOS26 ва Games – Apple WWDC25’да нималар тақдим қилди?
|21:46 / 10.06.202510 9288 мин
Apple компанияси WWDC 2025 йиллик конференциясида барча қурилмалари учун операцион тизимлар дизайни ва қўшимча функциялар билан боғлиқ янгиланишларни тақдим қилди. Мутахассисларга кўра, технология оламидаги ўйинчилар ўз қурилмаларига AI’ни интеграция қилиш билан банд бўлганда, Apple маҳсулотларининг ташқи кўринишига эътибор қаратмоқда.
Тақдимотда чиқиш қилган Apple компаниясининг бош ижрочи директори Тим Кук. Фото: Justin Sullivan / Getty Images
9 июнь куни Apple компанияси ўзининг йиллик Worldwide Developers Conference (WWDC25) тадбирида бир қанча йирик янгиланишларни тақдим этди. Хусусан, Apple маҳсулотлари операцион тизимлари дизайнининг янгиланиши, iPhone, iPad, Mac, AirPods ва бошқа қурилмалар учун янги функцияларни эълон қилди. Қуйида уларнинг энг муҳимларини санаб ўтамиз.
Операцион тизимлар янги номланишга ўтди
The Verge нашрининг ёзишича, Apple, кутилганидек, барча операцион тизимларининг версия рақамларини чиқарилган йил билан мослаб янгилади. Энди янги операцион тизимлар: iOS 26, macОS 26 ва watchOS 26 каби номлар билан чиқади. Бу номлар 2025 йил охирида чиқарилиши режалаштирилган ва рақамли номлардан (iOS 19, watchOS 12, macOS 16) эслаш осонроқ бўлади.
Ушбу операцион тизимлар ҳозирча ишлаб чиқувчилар, дастурчилар учун бета-версияда мавжуд, оммавий фойдаланувчилар учун эса бу кузда чиқарилади.
Liquid Glass дизайни: барча платформаларда янги кўриниш
Apple интерфейсларни янгилаш бўйича «Liquid Glass» деб номланган умумий дизайн тилини тақдим этди. У бутун OS’ларда тугмалар, следерлар, матн, медиа-бошқарувларда шаффофлик ва стакланган эффектлардан фойдаланади. Бу бир нечта визуал элементлар (матн, тугма, слайдер, фон ва ҳ.к.) устма-уст ва шаффоф кўринишида бўлишини билдиради.
Хусусан, iOS 26’нинг қулф экранига ҳам бу кўриниш киради, бу фон расмига янгича кўринишда эффект қўшади.
Мавзуга оид
Кузда iOS 26’ни қабул қиладиган iPhone’лар рўйхати
Дастур ичидаги дизайн янгиланишлари
Сафари иловаси тўлиқ экранли кўринишга эга бўлади. Камера иловаси энди икки асосий режим билан — фото ва видео тақдим этилади, қолган режимлар устки панель орқали кўринади.
Телефон иловаси эса Favorites, Recent, ва Voicemail функцияларини битта панелда бирлаштиради; пастки бўлимда эса Calls, Contacts ва Keypad мавжуд.
Messages иловасида суҳбатларнинг фон расмларини ўзгартириш, гуруҳ чатларда овоз бериш (poll), “ёзилмоқда” (typing) индикаторлари ва номаълум рақамлардан келган хабарларни алоҳида каталогда кўриш функциялари тақдим этилди.
iPadОS 26: windowing ва multitasking’ни такомиллаштириш
iPadОS 26’да кўп ойна (multi window) имкониятлари жиддий кенгайтирилди: ойналарни ўлчаш, турли жойларга жойлаштириш ва бир нечта ойнани бир вақтнинг ўзида очиш мумкин – бу амалдаги Mac’ларга жуда ўхшаб кетади.
Шунингдек, Маc’даги Preview иловасининг iPad версияси мавжуд — расм ва файлларни кўриб, белгилаш мумкин бўлади.
Янги Games иловаси
Apple Arcade ва App Store’даги ўйинларни битта жойда кўриб чиқиш имконини берувчи Games иловаси эълон қилинди. Бу ўйинлар учун марказий платформа бўлиб хизмат қилади, фойдаланувчилар дўстлари билан бирга ўйнаши ва аввалги ўйинларда қаерда тўхтаганини эслаб туриши осонлашади.
iOS26’даги барча ўзгаришлар
Маълумотларга кўра, Apple ўтган йили ўйинлардан 43,7 миллиард доллар даромад кўрган, шундан 13,1 миллиард доллари компаниянинг ўзида қолган.
macOS Tahoe26: Spotlight, Phone ва Games
macOS Tahoe26 кенгайтирилган дизайн тилини ўз ичига олади, экран пастки қисмидаги меню сатри тўлиқ шаффоф бўлди. Spotlight қидирувда шахсий фильтрлаш ва ҳаракатлар қўшилди, реал вақт эълон, ёзиш, электрон почта функциялари билан.
Шунингдек, Phone ва Games иловалари ҳам macOS’га кўчирилди.
Apple Intelligence ва Live Translation
iOS 26даги Apple Intelligence экранда кўрган нарсаларингизни скриншот тугмаси орқали AI ёрдамида излаш имконияти тақдим этилди. Бунда ChatGPT ва Google ёрдамида визуал қидирувлардан фойдаланиш мумкин. Бундай функция Android қурилмалари учун аллақачон мавжуд.
Матн ва аудио учун реал вақтда таржима: Messages, FaceTime ва Телефон иловаларида ишлайди. Шунингдек, ChatGPT асосидаги Image playground, Genmoji каби визуал AI технологиялари ҳам қўшилди. Siri янгиланишлари эса 2026 йилга қолдирилмоқда.
watchOS 26: билак белгиси ва Workout Buddy
watchOS 26’да «wrist flick» – билак тебратиш ёрдамида билдиришномаларни тез рад этиш мумкин. AI воситаси орқали Workout Buddy билан индивидуал машқлар бўйича маслаҳат ва рағбат берилади.
Масалан, югурувчилар Apple Watch билан AirPods жуфтлаганида фойдаланувчига «Зўр югуриш! Ўртача тезлигингиз бир милга 9 дақиқа 7 сония» каби илтифотлар айтилади.
AirPods янгиланишлари
Янги янгиланишлар: AirPods стемига босиш орқали iPhone/iPad билан фото ёки видео олиш, овоз изоляцияси билан «студиявий даражада» вокал ёзиш функциялари тақдим этилди. Бу хусусиятлар AirPods 4, AirPods 4 ANC ва AirPods Pro 2 учун мавжуд бўлади.
Бу янгиланишлар Apple экотизими ва қурилмалари дизайни ҳамоҳанглиги, AI интеграциясини кучайтиришга йўналтирилганлиги билан муҳим аҳамиятга эгалиги айтилмоқда.
Нима учун катта шов-шув қила олмади?
New York Times нашри колумнистларининг ёзишича, технология соҳаси қурилмаларга янги сунъий интеллект тизимларини жорий этиш билан банд бўлган бир пайтда, Apple маҳсулотларининг ташқи кўринишини чиройлироқ қилишга эътибор қаратмоқда.
2025 йилда қўшилган янгиликлар ўтган йилги ишлаб чиқувчилар конференциясида ваъда қилинган янгиланишларга қараганда кичикроқ. Хусусан, ўтган сафар AI асосий мавзу бўлганди.
2024 йил ёзида Appleʼнинг энг катта ваъдаларидан бири — Siri виртуал ёрдамчисини яхшилаш бўлган. У телефондаги маълумотларни, масалан, кимнингдир сафар жадвалига оид хабарни, интернетдаги маълумотлар билан бирлаштира олиши керак эди (масалан, самолёт келиш вақти). Бироқ март ойида Apple бу функцияни баҳорда чиқаришни кечиктирди ва у йил охиригача тайёр бўлмаслигини билдирди. Siri жамоасида ҳам раҳбарият алмашди.
macOS’да кутилаётган ўзгаришлар
Creative Strategies тадқиқот фирмасининг бош таҳлилчиси Каролина Миланеси бунинг оқибатлари ҳақида шундай деди:
«Қисқа муддатда одамлар Apple Intelligence етарлича ишламаяпти деб iPhone ёки Mac сотиб олишни тўхтатмайди. Аммо катта хавф шундаки, фойдаланувчилар ChatGPT ёки бошқа муқобил маҳсулотларга ўтиб кетишлари мумкин».
Тақдимотдан сўнг Apple акциялари 1 фоиздан кўпроққа тушди, S&P 500 эса озгина кўтарилди.
iPadOS’да кутилаётган ўзгаришлар
Журналистларнинг ёзишича, бу функциялар Apple бош директори Тим Кук компания учун энг муҳим маҳсулот — iPhone савдоларини фойдали ва кундалик ҳаётга тегишли янгиликлар билан оширмоқчи эканини кўрсатмоқда. «Гарчи бу янгиликлар бутун технология соҳасини банд қилган AI трендига мос бўлмаса-да, Apple янги технологияга кечроқ қўшилган тақдирда ҳам уни кенг оммага ёйиш имконига ишонмоқда», дейилади NYT хабарида.
