Трамп Миллий гвардия билан бирга Вашингтон кўчаларида патруллик қилмоқчи

АҚШ президенти Доналд Трамп Миллий гвардия ва полиция билан биргаликда Вашингтонни патрул қилишга қўшилиш ниятида эканини айтди. Бу ҳақда у Newsmax нашрига берган интервьюсида айтиб ўтди, деб хабар қилди DW.

Америка етакчисининг тушунтиришича, у ҳарбийларнинг «фантастик ишига» шахсан ишонч ҳосил қилмоқчи.

Шу билан бирга, NBC News таъкидлаганидек, Трамп Вашингтонда ҳуқуқ-тартибот идоралари ходимлари ва Миллий гвардия ҳарбийлари билан учрашишни режалаштирмоқда. Оқ уй вакили сўзларига кўра, президент уларга ўз маъмурияти томонидан жиноятчиликка қарши кураш бўйича жорий этилган чора-тадбирларни амалга ошириш борасидаги саъй-ҳаракатлари учун миннатдорлик билдирди. Шу билан бирга, телеканал суҳбатдоши ташриф жойи ва вақтига аниқлик киритмади.

Аввалроқ Трамп пойтахтни «жиноятчилик, қон тўкилиши, тартибсизлик ва фалокатлардан» ҳимоя қилиш учун «Вашингтондаги фавқулодда хавфсизлик ҳолати» туфайли турли штатлардан 2 мингга яқин Миллий гвардия аскарлари ва ҳарбийларни юборган эди.

Танқидчиларнинг таъкидлашича, АҚШ пойтахти Демократик партиянинг таянчи бўлиб, Трампнинг ҳаракатлари аҳолини чўчитишга қаратилган.