Қўшимча функционаллар
-
Тунги кўриниш
Зеленский Путинни музокараларни кечиктириш тактикасида айблади
«Агар учрашув бўлмаслигини истасангиз, мени Москвага таклиф қилишингиз керак», — деди Украина президенти. У Путинни урушни тартибга солиш бўйича музокараларни кечиктиришда айблади.
Украина президенти Володимир Зеленский яна бир бор президент Владимир Путин билан Москвадаги учрашувга бормаслигини айтди ва Путинни музокараларни кечиктираётганликда айблади. «Америкалик ҳамкорларимиз бизга Путин мени Москвага таклиф қилганини айтди. Ўйлайманки, агар учрашув бўлмаслигини истасангиз, мени Москвага таклиф қилишингиз керак», — деди Зеленский 4 сентябр, пайшанба куни Парижда «кўнгиллилар коалицияси» саммитидан кейин ўтказилган матбуот анжуманида.
Украина президентининг таъкидлашича, учрашувнинг ўзи «зарур», бироқ Россия уни кечиктириш учун ҳамма нарсани қилмоқда. Шу билан бирга, у Путиннинг бундай учрашув ҳақида гапира бошлагани ёмон эмаслигини қайд этган.
3 сентябр куни Владимир Путин Украина президенти билан учрашув ҳақида гапириб, «агар Зеленский тайёр бўлса, Москвага келсин», деди. Шу билан бирга, у ва бошқа россиялик расмийлар аввалроқ Зеленский билан учрашув фақат музокараларнинг якуний босқичида бўлиши мумкинлигини таъкидлаган эди.
