Россия «Дождь» бош муҳаррири ва журналистларини «террорчилар» деб эълон қилди

Росфинмониторинг ўзининг «террорчилар ва экстремистлар» рўйхатига «Дождь» бош муҳаррири Тихон Дзядкони, шунингдек, ахборот бўлими раҳбари Екатерина Котрикадзе ва бошловчи Валерия Ратниковани қўшди.

Тихон Дзядко Фото: Евгения Новоженина / Reuters

7 октябр, сешанба куни Росфинмониторинг «Дождь» телеканали бош муҳаррири Тихон Дзядко, шунингдек, унинг ахборот бўлими бошлиғи Екатерина Котрикадзе ва бошловчи Валерия Ратниковани «террорчилар ва экстремистлар» рўйхатига киритди.

«Террорчилар» рўйхатига қўшилиш, бошқа нарсалар қатори, уларнинг барча Россия банкларидаги ҳисобларини музлатиш ва ойлик харажатларини 10 000 рублгача чеклашни англатади. «Интерфакс»нинг қайд этишича, учала журналист ҳам рўйхатда юлдузчасиз кўрсатилган, у одатда «террорчилик моддаси» бўйича иш қўзғатилганини билдиради.

Бир кун аввал Тихон Дзядко сиртдан ҳибсга олингани хабар қилинган эди. Москванинг Головинский суди терговчиларнинг илтимосига биноан уни икки ойга сиртдан ҳибсга олишга қарор қилди. У «чет эл агенти» сифатидаги мажбуриятларини бажаришдан бўйин товлаганликда ва Россия Қуролли кучлари ҳақида «фейк хабарлар» тарқатганликда айбланмоқда. Журналист қидирувга берилган.

Июл ойида Россия Тергов қўмитаси «чет эл агентлари» реестрига киритилган Екатерина Котрикадзе, Валерия Ратникова ва Тихон Дзядкога нисбатан жиноий иш очган эди. «Дождь» журналистлари Украинага қарши урушни давом эттираётган Россия армияси ҳақидаги «фейкларда» ва «чет эл агенти» сифатидаги мажбуриятларини бажаришдан бўйин товлаганликда» айбланган. Иш хабар мессенжерлардан биридаги пост туфайли очилган.

Тайёрлаган: Отабек Матназаров

#Россия #Дождь #Тихон Дзядко